एलेक्जेन्ड्रिया, असोज २१ ।  इजिप्टमा गोली हानेर २ जना इजरायली पर्यटक सहित ३ जनाको हत्या गरिएको छ। इजरायलले प्यालेस्टाइनी इस्लामिस्ट समूह हमाससँग युद्ध गरिरहेका बेला छिमेकी इजिप्टमा इजरायली पर्यटकको हत्या भएको हो।

समाचार संस्था एपीका अनुसार एलेक्जेन्ड्रिया शहरमा १ जना प्रहरीले आइतबार पर्यटकहरू माथि गोली चलाएका थिए।मारिनेमा १ जना इजिप्टका नागरिक पनि छन्। प्रहरीले इजरायली पर्यटक माथि गोली हान्नुको कारण खुलेको छैन।

आक्रमणकारी प्रहरीलाई सुरक्षाकर्मीहरूले नियन्त्रणमा लिएका छन्। इजिप्टले इजरायलसँगको सम्बन्ध सामान्य बनाइसकेको छ। पछिल्लो केही समयदेखि उसले इजरायल र अरू अरब मुलुकबीच द्वन्द्व हुँदा मध्यस्थताको भूमिका निर्वाह गर्दै आएको छ। तर इजिप्टका केही नागरिकमा इजरायल विरोधी भावना भने व्याप्त छ।