काठमाडौं, असोज २५ । नेपाली विद्यार्थीहरुको उद्धार गर्न गएको नेपाल एयरलाइन्सको विमान इजरायल पुगेको छ।

नेपालबाट जहाज लिन गएपछि नेपाली विद्यार्थीहरू तेलअभिभ विमानस्थल पुगेका छन् । इजरायलबाट नेपाली लिएर वाइडबडी विमान आज राति १ः३० बजे त्रिभुवन विमानस्थलमा अवतरण गर्नेछ ।

नेपाली विद्यार्थीहरू विमान भित्र बसिसकेको जानकारी एक विद्यार्थीले दिएका छन् । करिब चार सय नेपाली नागरिकमध्ये आज नेपाल वायुसेवा निगमको विमानमा २५० जना घर फर्कन लागेका हुन् । इजरायल सरकारले हस्तान्तरण नगरेका कारण त्यहाँ मारिएका विद्यार्थीको शव भने आज ल्याइने छैन । नेपालीहरुको उद्धार गर्न परराष्ट्रमन्त्री एनपी साउद आफै इजरायल पुगेका छन्।

असोज २० गते हमासले इजरायलका विभिन्न स्थानमा रकेट सहित आक्रमण गर्दा १० नेपाली विद्यार्थीको मृत्यु हुनुको साथै ४ जना घाइते भएका थिए । विद्रोही समूहको आक्रमणबाट एक नेपाली वेपत्ता छन् ।