काठमाडौं, असोज २६ । इजरायलबाट उद्धार गरिएका २ सय ५४ नेपालीलाई आज बिहान नेपाल ल्याइएको छ ।

उनीहरुलाई नेपाल वायुसेवा निगमको वाइडबडी विमानबाट स्वदेश ल्याइएको थियो । उनीहरुलाई लिन परराष्ट्रमन्त्री एनपी साउदलगायत सरकारी अधिकारीहरु इजरायल गएका थिए । उद्धार उडानपछि त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै मन्त्री साउदले इजरायलबाट नेपाल फर्किन चाहने ५०३ नेपालीमध्ये २५४ जनालाई उद्धार उडानमा ल्याइएको र बाँकीलाई पनि छिट्टै ल्याइने बताए ।

इजरायलको तेलअभिभस्थित नेपाली दूतावासले सुरक्षित स्थानमा स्थानान्तरण गर्न र नेपाल फर्किन चाहने नेपालीलाई आफ्नो विवरण अनलाइनमा दिन अनुरोध गरेपछि ५५७ नेपालीले आफ्नो विवरण उपलब्ध गराएको थियो । ५५७ नेपालीमध्ये ५०३ जनाले नेपाल फर्किनका लागि निवेदन दिएका थिए र आज २५४ जना हामीसँगै स्वदेश फर्किएका छन्।

उनका अनुसार जोखिमयुक्त क्षेत्रबाट सार्न अनुरोध गरेका ५४ नेपालीलाई इजरायलको सुरक्षित क्षेत्रमा सारिएको छ । इजरायलको दक्षिणी क्षेत्रमा हमास विद्रोहीको आक्रमणमा परी चार नेपाली घाइते भएको र तीमध्ये एकजना उपचारपछि आज नेपाल फर्किएका, अर्का एकजना अस्पतालबाट डिस्चार्ज भएका र दुईजनाको इजरायलको अस्पतालमा उपचार भइरहेको उनले बताए । ‘आक्रमणपछि बेपत्ता भएका विपिन जोशीको खोजी जारी छ । यसबारे थप जानकारी पाउने बित्तिकै जानकारी गराउँछौँ,’ मन्त्री साउदले भने ।

परराष्ट्रमन्त्रीले हमास समूहको आक्रमणमा नेपालको सुदूरपश्चिम विश्वविद्यालयबाट इजरायल गएका १० नेपाली विद्यार्थीको मृत्यु भएको र उनीहरुको शव नेपाल ल्याउन इजरायल सरकारसँग समन्वय भइरहेको बताए । 'इजरायली पक्षले कानुनी प्रक्रिया पूरा गर्न र प्रत्येक मृतकको छुट्टाछुट्टै विवरण राख्न आवश्यक भएकाले शव हस्तान्तरण गर्न केही समय लाग्ने बताएको छ र इजरायलमा शवको संख्या धेरै छ,' उनले भने। उनले मृतक नेपालीका परिवार र आफन्तजनलाई केही समय धैर्य गर्न आग्रह गरेका छन् ।

मन्त्री साउदले अहिले तेलअभिभबाट नियमित व्यावसायिक उडान पनि सञ्चालन भइरहेकाले केही कारणले यसपटक ल्याउन नसकेका नेपालीलाई स्वदेश फर्काउने व्यवस्था सरकारले गर्ने बताए । परराष्ट्रमन्त्रीले उद्धारमा सहयोग गर्ने सञ्चारकर्मी, सञ्चारकर्मी, इजरायल सरकार र नेपाल सरकार, इजरायलस्थित नेपाली राजदूतावास र इजरायलस्थित नेपाली राजदूतावास र विमान चालक दलका सदस्यलाई धन्यवाद ज्ञापन गर्नुभएको छ । यसमा नेपाली नागरिकले ऐक्यबद्धता जनाएका छन् ।

उद्धार गरिएका नेपालीलाई विभिन्न गन्तव्यमा पुर्‍याउन नेपाल प्रहरीले तीनवटा बसलाई विमानस्थलमा स्ट्यान्डबाइ राखेको थियो । मन्त्रालयको तथ्यांकअनुसार हाल इजरायलमा २ सय ६५ नेपाली विद्यार्थी अध्ययनरत छन् भने करिब चार हजार ५ सय विभिन्न पेसा र क्षेत्रमा कार्यरत छन् ।

२६५ नेपाली विद्यार्थी इजरायल सरकारको आर्थिक सहयोगमा ‘सिक्नुहोस् र कमाउनुहोस्’ कार्यक्रममा गएका हुन् । परराष्ट्र मन्त्रालयले आवश्यक प्रक्रिया पूरा भएपछि सबै मृतकको शव जतिसक्दो चाँडो नेपाल ल्याइने जनाएको छ ।