काठमाडौं, असोज २६ । नेपाली राष्ट्रिय क्रिकेट खेलाडी सन्दीप लामिछानेले आगामी क्रिकेट प्रतियोगिता नखेल्ने भन्दै राष्ट्रिय टिमबाट नाम फिर्ता लिएका छन् ।
फेसबुक, ट्वीटरलगायत सामाजिक सञ्जालमा सन्देश दिँदै उनले भनेका छन्, ‘भारी मनले आगामी प्रतियोगिताबाट नाम फिर्ता लिने निर्णय गरेको छु । म मेरो जीवनको कठिन र चुनौतीपूर्ण समयहरूबाट गुज्रिरहेको छु र मैले आफूलाई पुनर्जीवित गर्न आवश्यक छ र परिवारलाई समय चाहिन्छ भन्ने महसुस गर्छु। अहिलेसम्म पाएका सबै आशीर्वाद र शुभकामनाका लागि कृतज्ञता व्यक्त गर्छु।'
सन्दीपमाथि जबरजस्ती करणीको मुद्दा चलिरहेको छ र काठमाडौं जिल्ला अदालतले अन्तिम फैसला सुनाउनुपर्ने भएको छ । तर, अदालतले फैसलामा ढिलाइ गर्दै उनको क्रिकेट करियरमा अन्योल र तनाव सिर्जना गरेको छ । अदालतमा मुद्दा चल्दा पनि उनी स्वदेश तथा विदेशका खेलका लागि नेपाली टोलीमा परेका छन् ।
उनी नेपाली क्रिकेट टोलीको एक प्रमुख व्यक्तित्व बनेका छन्। नेपाल क्रिकेट संघ (क्यान) का अनुसार नेपालले काठमाडौंमा त्रिकोणात्मक सिरिज खेल्दैछ । प्रतियोगितामा नेपालसँगै युएई र हङकङ रहेका छन् । क्यानका अनुसार यो सिरिज असोज १८ देखि अक्टोबर २७ सम्म काठमाडौंमा सञ्चालन हुनेछ ।
