काठमाडौं, कात्तिक १० । त्रिकोणात्मक टि-२०आई सिरिजको उपाधिका लागि आज घरेलु टिम नेपालले युएईसँग खेल्दैछ । खेल कीर्तिपूरस्थित त्रिवि मैदानमा बिहानको ११ बजे सुरु हुनेछ ।
नेपालले हङकङ र यूएईलाई समान २/२ खेलमा हराएको थियो । यूएईले हङकङलाई १ खेलमा हराउँदै नेट रनरेटका कारण फाइनलमा पुगेको हो । नेपालले पछिल्लो खेलमा यूएईलाई ५ विकेटले हराएको थियो ।
आजको फाइनल खेलमा नेपाल र युएईबीच कडा प्रतिस्पर्धा हुने अनुमान गरिएको छ । खेलमा नेपाल उपाधि जित्न चाहन्छ । युएई पनि नेपाललाई फाइनलमा हराउने सोचमा हुनेछ ।
नेपालले आजको खेलमा अलराउन्डर विवेक यादवको स्थानमा स्पिनर ललितनारायण राजवंशीलाई खेलाउने सम्भावना छ । ललितको युएईविरुद्ध पछिल्लो समय प्रदर्शन राम्रो छ । यसपटकको खेलमा सन्दीप लामिछाने नभएकाले ललित प्रमुख स्पिनर रहेका छन् ।
त्रिकोणात्मक टि-२०आई सिरिज लगतै नेपालले टी-२० विश्वकप २०२४ को एसिया क्षेत्रको छनोट प्रतियोगिता खेल्दैछ । घरेलु मैदान नेपालमा हुन लागेको खेल यही अक्टोबर ३० सोमबारदेखि हुँदैछ जसमा नेपालसहित आठ देशले भाग लिनेछन् ।
