काठमाडौं, कात्तिक २१ । नेपाल क्रिकेट संघ (क्यान) ले आईसीसी टी-२० विश्वकपमा छनौट हुन सफल नेपाली टोलीलाई ५० लाख नगद पुरस्कारसहित सम्मान गर्ने भएको छ ।

सोमबार बसेको क्यानको केन्द्रीय कार्यसमिति बैठकले सन् २०२४ मा वेष्ट ईन्डिज र अमेरिकामा सञ्चालन हुने आईसीसी टी-२० क्रिकेट विश्वकप प्रतियोगितामा सहभागिताका लागि छनौट हुन सफल राष्ट्रिय क्रिकेट टोलीलाई ५० लाख नगद पुरस्कारसहित सम्मान गर्ने निर्णय गरेको हो ।

यस्तै संघले मलेसियामा सम्पन्न एसीसी पुरुष १९ वर्षमुनिको प्रिमियर कप क्रिकेट प्रतियोगितामा विजयी टोलीका सबै सदस्यलाई जनही ५० हजार रुपैयाँ दिने निर्णय पनि क्यानले निर्णय गरेको छ ।