मुगु, कात्तिक २४ ।  मुगुमा ३ बच्चा र आमाको सामूहिक हत्यामा संलग्न दुवै जनाको मृतकसँग चिनजान रहेको र आफन्तको रूपमा उनीहरू घरभित्र छिरेको अनुसन्धानमा खुलेको छ।

हत्यामा संलग्न गोर्ख बहादुर शाही ठकुरी र गोपाल बोहोरा हत्या अघि ढोका ढकढकाएरै श्रीदेवी बोहोराको घरभित्र प्रवेश गरेका थिए।

केही समय उनीहरू बीच गफ समेत भएको थियो। घरभित्र पुगेपछि साँझ कहाँ पुगेर आउनुभयो भनेर श्रीदेवीले सोधेकी थिइन्। केही समय गफ गरेपछि उनीहरूले धारिलो हतियार प्रहार गरी श्रीदेवी उनका २ छोरा तथा १ छोरीको हत्या गरी लुटपाट गरेका हुन्।

लुटपाटमा संलग्न मुगुको पिना गाउँपालिका-७ का गोर्ख बहादुर शाही ठकुरी र गोपाल बोहोरालाई प्रहरीले पक्राउ गरिसकेको छ। दुवैले अभियोग स्वीकार गरेका छन्।

अभियुक्तहरूले महिलाको मात्र हत्या गर्ने योजना रहेको बताएका छन्। ‘हामी जाँदा बच्चाहरू सुतिसकेका छन् भन्ने लागेको थियो, तर बच्चाहरू सुतेका रहेनछन्,’ सोधपुछमा उनीहरूले प्रहरीसँग भनेका छन्, ‘बच्चाहरूले पनि हामीलाई चिन्ने भएकाले उनीहरूलाई पनि मारेका हौँ।’

छायाँनाथ रारा गाउँपालिका-६ मुन्दुगाउँ निवासी २८ वर्षीया श्रीदेवी बोहोरा, उनका ११ वर्षीय छोरा मनोज, ७ वर्षकी छोरी अप्सरा तथा १ वर्षका छोरा रहरको गत ८ कात्तिकमा हत्या भएको थियो।

१० कात्तिकमा उनीहरूको शव प्रहरीले फेला पारेको थियो  । हत्या पछि उनीहरूले साढे २ तोलाको सुनको रिङ, २५ ग्रामको तिलहरी, चेक, लालपुर्जा र करिब ५/६ हजार नगद लुटेका थिए। 

सुन उनीहरूले नेपालगन्जको सुन पसलमा लगेर बिक्री गरेका थिए। सुन बिक्रीको १ लाख ७९ हजार रुपैयाँ प्रहरीले गोर्खको कोहलपुरस्थित डेराबाट बरामद गरेको छ। मोबाइल भने सुर्खेतको बाँसघारीमा फालेको बताएका छन्। 

हत्याको मुख्य योजना सुन लुट्ने भए पनि रिसइवी समेत भएको खुलेको छ। हत्यामा संलग्नमध्ये गोपाल बोहोरा र उनका दाइ श्रीदेवीका श्रीमान् दीपक सँगै वैदेशिक रोजगारीमा कतार गएका थिए । तर, उनीहरूले राम्रो काम नपाएपछि स्वदेश फर्किए। 

दीपकले भने मासिक करिब १ लाख कमाएका थिए। सोही पैसाबाट श्रीमतीलाई गहना किनिदिएका थिए। जग्गा पनि जोडेका थिए। यसरी सम्पत्ति कमाएको रिसिइवी समेत हत्याको कारण भएको अनुसन्धानमा आबद्ध एक प्रहरी अधिकारी बताउँछन्। साथै गोपालको परिवारले ६० हजार सापटी लिएकोमा श्रीदेवीलाई २० हजार मात्र फिर्ता गरेको समेत अनुसन्धानमा खुलेको छ।  

श्रीदेवीले लगाउने सुनका गहना देखेपछि नै उनीहरूले गत जेठमै लुटपाट  र हत्याको योजना बनाएका थिए। योजना अनुसार शाही ५ कात्तिकमा सुर्खेतबाट पिना गई गोपालको गोठघरमा बसेका थिए। गाउँलेलाई थाहा नहोस् भनेर उनी गोपालको गोठमा लुकेर बसेका थिए। 

योजना अनुसार नै उनीहरूले ८ कात्तिकको साँझमा हत्या गरी सुर्खेत पुगेका थिए।  प्रहरीले सोमबार नै गोर्खलाई पक्राउ गरेको थियो। उनकै बयानका आधारमा गोपाल पक्राउ परेका हुन्। गोपाललाई घरबाटै प्रहरीले पक्राउ गरेको हो । ४/५ वर्ष भारतको हिमाञ्चलमा बसेर काम गरेका शाही पछिल्लो समय कुनै पनि काममा संलग्न नभएको समेत अनुसन्धानमा खुलेको छ। 

केन्द्रीय अनुसन्धान ब्युरो (सिआइबी)ले स्थानीय प्रहरीसँग मिलेर घटनाको २ साता पछि सामूहिक हत्याको सफल अनुसन्धान गरेको हो।