काठमाडौं, मंसिर ५ । ‘लघुवित्तीय संस्था विरुद्धको संघर्ष समिति'का अध्यक्ष मनिराम ज्ञवालीले अभियन्ता दुर्गा प्रसाईं राजसंस्थाको मुद्दा त्याग्न तयार भए आफूहरू उनिसँग सहकार्य गर्ने बताएका छन् ।

मंगलबार राजधानीको संवाद डबलीमा संघर्ष समितिद्वारा आयोजित पत्रकार सम्मेलनमा संघर्षका कार्यक्रम सार्वजनिक गर्दै अध्यक्ष ज्ञवालीले राजतन्त्रको मुद्दा बोक्ने प्रसाईबाट वित्तिय अराजकताबाट पीडित जनताले मुक्ति नपाउने ठोकुवासमेत गरेका छन् ।

अध्यक्ष ज्ञवालीले २०४२ सालमा राजतन्त्रले खुल्ला अर्थतन्त्र र निजीकरणको नीति ल्याएर देशमा आर्थिक अराजकता निम्त्याएको बताउँदै पुनः त्यही तन्त्रबाट समस्या हल हुने भन्दा झन बिग्रने जिकिर गरे । बैंक, सहकारी तथा लघुवित्त पीडित जनताको सहानुभूति लिएर राजतन्त्र फर्काउने प्रसाईको द्वैद चरित्रसहितको सपना पूरा नहुने उनको जिकिर छ ।

आफूहरूले प्रसाईँले उठाएका राजतन्त्र बाहेकको वित्तिय अराजकता विरोधी मुद्दालाई समर्थन गरेको र सहकार्य पनि गर्न तयार रहेको बताउँदै भने,“दुर्गा जी जनताको पीडक राजसंस्थाको मुद्दा त्यागेर आउनुस् भोलिबाटै हामी हातेमालो गर्न तयार छौं, तर तपाई पीडितको फेरो समाएर चिहानको कंकाललाई जीवित पर्ने सोच त्याग्नुस् ।” अहिलेको गणतन्त्रले समस्या हल किन नगरेको भन्ने प्रश्नको जवाफमा ज्ञवालीले भने,“राजन्त्र फालेर बल्ल बोल्ने र आन्दोलन गर्ने अवसर मिलेको छ, यही आन्दोनलनबाट सरकारले सम्बोधन गर्नेमा हामी विश्वस्त छौं ।”

सो संघर्ष समितिका संरक्षक अगस्त अधिकारीले आफूहरूको नारा बेचेर प्रसाईँले राजसंस्था ल्याउने आधार बनाउन लागेको भन्दै आक्रोश व्यक्त गरे । आफूहरूले २२ महिना देखि आन्दोलन गर्दै आएको मुद्दा उठाएर प्रसाईँले संघर्षलाई डाइभर्ट गर्न लागेको आरोप लगाउँदै भने,“ठूलो त्याग गरेर सामन्ती राजतन्त्र फल्यौ पुनः त्यसैको पुनस्थापना गर्न पीडित जनतालाई भ्रमित पार्दै वितण्डा मच्चाउने उनको सपना पूरा हुनै सक्दैन ।”

सो संघर्ष समिति सुदूरपश्चिम प्रदेश इन्चार्ज मणि प्रसाद चौलागाइँले आफूहरूको र दुर्गा प्रसाईँको आन्दोलनमा आकाशपातालको अन्तर रहेको धारणा राखे । चौलागाईले सरकारले वित्तिय माफियाहरूलाई कारबाही गर्न नसके आफूहरूले सडकबाट कारबाही गर्ने चेतावनी समेत दिए ।

कर्णाली प्रदेश संयोजक आशा सञ्जेलले लघुवित्तीय संस्थाहरुको अराजकता गाउँगाउँ पुगेर उठिबास लगाउन थालेकाले सरकारले छिटो भन्दा छिटो निकास दिन पर्ने धारणा राखिन् । समितिका विदेश विभाग प्रमुख गगन बहादुर विकले देशमा लघुवित्तहरुको ज्यादतिको कारण हजारौं दिदी–बहिनीहरु विदेश गएर झन दुःख पाइरहेकोले अब विदेशबाट पनि झिकाएर संघर्ष गर्ने चेतावनी दिए ।

केन्द्रीय सचिव तथा वार्ता कमिटी संयोजक रमेश तामाङले नयाँ संघर्षका कार्यक्रम सार्वजनिक गर्दै फागुन १ गतेदेखि काठमाडौं केन्द्रित अनिश्चितकालीन धर्ना तथा विरोध कार्यक्रम गर्ने बताए ।

संघर्षका कार्यक्रमहरुः
१) २०८० मंसिर ५ गते काठमाडौं लगायत विभिन्न जिल्लाहरुमा विरोध प्रदर्शन ।
२) २०८० मंसिर १५ गतेदेखि देशव्यापी रुपमा विरोध प्रदर्शन जारी राख्ने ।
३) २०८० मंसिर २६ गते राष्ट्र बैंक केन्द्रित आन्दोलन, प्रदेश सम्मेलन सहित सुदूर पश्चिमबाट सुरु गर्ने ।
४) २०८० पुस ३ गते कर्णाली प्रदेश ।
५) २०८० पुस ८ गते लुम्बिनी प्रदेश ।
६) २०८० पुस १३ गते गण्डकी प्रदेश ।
७) २०८० पुस १७ गते बागमती प्रदेश ।
८) २०८० पुस २४ गते मधेश प्रदेश ।
९) २०८० माघ ७ गते कोशी प्रदेश ।
१०) २०८० माघ १६ र १७ गते राष्ट्रिय सम्मेलन ।
११) २०८० फागुन १ गतेदेखि काठमाडौं केन्द्रित अनिश्चितकालीन धर्ना तथा विरोध कार्यक्रम ।