काठमाडौं, मंसिर ६ । चर्चित गायक स्वरुपराज आचार्य र गायिका रचना रिमालको सुमधुर स्वरमा रहेको गीत 'फूल्यो चमेली' को म्युजिक भिडियो सार्वजनिक गरिएको छ ।

मनमैजु सांस्कृतिक समाजको प्रस्तुतिमा गीतकार डा. कमलराज शर्माको शब्द र हरि लम्सालको कर्णप्रिय संगीत रहेको गीतको भिडियोमा लोकप्रिय कलाकार गौरव पहारी र उषा रजकको अभिनय रहेको छ । भिडियोमा देशको विद्यमान अवस्था र जीवन निर्वाहका लागि विदेशिएका नेपालीहरूको कारुणिक जीवनलाई  जीवन्त चित्रण गरिएको छ ।

उत्तम हुमागाईँको सिनेमाटोग्राफी र बिकाश धमलाको सम्पादन रहेको भिडियोलाई निकेश खड्काले निर्देशन गरेका हुन्  । देशवासीको लागि विद्यमान चारैतिरको अवस्था ज्यादै दुरुह बन्दै गैरहेको ,चरम अस्थिरताले मानिसको मन अनिश्चित गन्तव्यतर्फ उडाइरहेको बर्तमान अवस्थामा अनुकुल अवसर खोजीमा विदेश जानै पर्ने बाध्यता पैदा गरिएको तथापि विदेशमा काम गर्दाको अवस्था पनि उत्तिकै प्रतिकुल छ । सबै भन्दा उत्तम विकल्प त पसिना सिँचेर आफ्नै धरतीको सेवा गर्नु नै हो भन्दै आफ्नै देशको माटोलाई सिरानी बनाउन यहि देशमा फर्केर आउन अपिल गर्दै गीत रचना गरिएको गीतकार शर्माले बताउनु भयो ।

साथै उहाले छिट्टै नै मनमैजु सांस्कृतिक समाजको प्रस्तुतिमा निर्माण गरिएको लघु चलचित्र ’कथा आफै बोल्छ’ जसले भारतको मुम्बईमा हालै आयोजित एक प्रतिष्ठित इन्टरनेशनल फिल्म फेस्टिभलमा तीन विधामा सर्वोत्कृष्ट हुदै अवार्ड प्राप्त गरेको थियो उक्त लघु चलचित्रलाई पनि रिलिज गरिने जानकारी दिनु भयो ।