लमजुङ, मंसिर १२ । अलैँची खेतीको ‘हब’ बन्दै गरेको लमजुङका किसानले अलैँची दाना बिक्री गरेर २४ करोड रुपैयाँ आम्दानी गरेका छन्। प्रधानमन्त्री कृषि आधुनिकीकरण परियोजना कार्यान्वयन इकाइ लमजुङका अनुसार जिल्लामा उत्पादित २५१ मेट्रिक टन अलैँची दाना बिक्रीबाट यस वर्ष उक्त रकम आम्दानी भएको हो।
आर्थिक वर्ष २०८०/८१ मा अलैँची दाना बिक्रीबाट सो रकम आम्दानी भएको परियोजना कार्यान्वयन इकाइ लमजुङका कृषि अधिकृत हरिबहादुर मिजारले जानकारी दिए। यहाँ विसं २०४१ बाट अलैँचीखेती विस्तार हुँदै आएको छ। अधिकृत मिजारका अनुसार यस वर्ष जिल्लाका किसानले प्रतिकिलो १ हजार २ सयका दरले अलैँची बिक्री भएको छ।
गत वर्ष ३८० मेट्रिक टन अलैँची दाना बिक्रीबाट २० करोड रुपैयाँ आम्दानी भएको थियो। आव २०७९/८० मा प्रतिकिलो अलैँची कम्तीमा ५५० रुपैयाँ देखि ७ सयसम्म बिक्री भएको थियो। उत्पादनका हिसाबले अलैँची दाना उत्पादन घटे पनि मूल्य वृद्धि हुँदा जिल्लाका किसानले यस वर्ष हालसम्मकै बढी आम्दानी गरेका छन्।
आव २०७८/७९ मा ३ सय ३५ मेट्रिक टन अलैँची दाना बिक्रीबाट १५ करोड रुपैयाँ आम्दानी भएको थियो। त्यस्तै, एक दशकअघि १३ करोड रुपैयाँसम्म अलैँची दाना बिक्रीबाट आम्दानी भएको थियो।
आव २०७७/७८ मा ३ हजार ५ सय क्विन्टल अलैँची दाना बिक्रीबाट १८ करोड २० लाख रुपैयाँ आम्दानी भएको थियो। उक्त वर्ष ९५० देखि साढे १ हजार रुपैयाँ बढी मूल्यमा बिक्री गरेका थिए।
आव २०७६/७७ मा जिल्लामा २ हजार क्विन्टल अलैँची दाना बिक्री गरेर किसानले १२ करोड रुपैयाँ आम्दानी गरेका थिए। त्यस्तै आव २०७५/७६ मा ७ सय ५० क्विन्टल अलैँची दाना बिक्रीबाट किसानले ५ करोड २५ लाख रुपैयाँ आम्दानी गरेका थिए।
मर्स्याङ्दी गाउँपालिका-७ लुदीका सोमबहादुर तामाङले यस वर्ष गत वर्षको तुलनामा कम उत्पादन गरी बढी आम्दानी गरेका छन्। २७५ किलो अलैँची दाना बिक्रीबाट ३ लाख ७१ हजार २५० रुपैयाँ आम्दानी गरेको उनले बताए। उनका अनुसार गत वर्ष साढे ३ क्विन्टल अलैँची दाना बिक्री गरेर करिब २ लाख रुपैयाँ मात्र आम्दानी भएको थियो।
जिल्लाभरिका अधिकांश किसानले १ हजार २ सय रुपैयाँमा प्रतिकिलो अलैँची बिक्री गरे पनि यहाँका तामाङ सहित गाउँलेले १ हजार ३५० रुपैयाँ प्रतिकिलो अलैँची दाना बिक्री गरेको बताइएको छ।
तामाङले मात्र नभई जिल्लाका अधिकांश अलैँची किसानको अलैँची खेतीबाट अलैँची दाना उत्पादन कम गरेका छन्। जिल्लाका किसानले कुनैबेला प्रतिकिलो २ हजार २ सय रुपैयाँसम्म अलैँची दाना बिक्रीबाट लिने गरेका थिए।
जिल्लामा उत्पादित अलैँची दानाको माग उच्च रहँदै आएको छ। भारतको एकाधिकारका कारण किसानको माग अनुसार अलैँची दानाको मूल्य नपाएको गुनासो गर्दै आए पनि यस वर्ष भने केही राहत महसुस गरेका छन्। यस वर्ष अलैँची दानाको मूल्यवृद्धि हुँदा अलैँची किसान हर्षित भएका छन्।
जिल्लामा १ हजार हेक्टर बढी क्षेत्रफलमा अलैँचीखेती हुँदै आए पनि ५ सय हेक्टर भन्दा कम क्षेत्रफलबाट उत्पादन हुँदै आएको बताइएको छ। उक्त परियोजनाले अलैँची जोन पकेट क्षेत्रका रुपमा मर्स्याङ्दी गाउँपालिका, बेँसीसहर नगरपालिका, क्व्होलासोथर गाउँपालिका, दोर्दी गाउँपालिका र दूधपोखरी गाउँपालिकालाई घोषणा गरिसकेको छ।
सो क्षेत्रमा सबैभन्दा बढी अलैँची उत्पादन हुने गरेको छ। जिल्लामा ७ सय मिटर देखि १ हजार २ सय मिटर उचाइमा साउन्ने, जिर्मले र डम्बरशाही, १ हजार २ सय मिटर देखि १६ सय मिटर उचाइमा गोलशाही र १ हजार ६ सय देखि २ हजार २ सय मिटर उचाइमा रामशाही र भलाङे जातका अलैँची बिरुवा लगाउँदै आएका छन्।
जिल्लामा बढी उमेरका अलैँची कृषकले १५/१६ वर्षको बुढो उमेरका बोटबाट पाना च्यातेर सार्ने, बुढो बगान, स्याहारसुसारमा कमी लगायत कारणले बर्सेनि उत्पादन घट्दै गएको उक्त कार्यालयका कृषि अधिकृत मिजारले बताए।
श्रोत:रासस
