काठमाडौं, मंसिर १३ ।  सुनको भाउ आज एकैदिन तोलमा १ हजार ६ सय रुपैयाँले बढेको छ । आज तोलामा १ लाख १९ हजार ३ सय रुपैयाँ पुगेको सुनको भाउ अहिलेसम्मकै उच्च हो । हिजो सुन तोलामा १ लाख १७ हजार ७ सय रुपैयाँ थियो ।

यो हप्ता आइतवार देखि नै सुनको भाउ निरन्तर बढेको छ । आइतवार तोलामा १ लाख १६ हजार ९ सय रुपैयाँ थियो । सोमवार १ लाख १७ हजार ४ सय रुपैयाँमा कारोबार भएको थियो । अन्तर्राष्ट्रिय बजारमा नै सुनको भाउ बढेकाले नेपाली बजारमा पनि भाउ बढेको नेपाल सुन चाँदी व्यवसायी महासङ्घका अध्यक्ष माणिकरत्न शाक्यले बताउनुभयो ।

आज चाँदीको पनि भाउ बढेको छ । हिजो तोलाको १ हजार ५ सय रुपैयाँमा कारोबार भैरहेको चाँदी आज २० रुपैयाँले बढेर १ हजार ५ सय २० रुपैयाँ पुगेको छ । चाँदीको यो भाउ पनि अहिलेसम्मकै महँगो हो ।