सिन्‍धुली, पुस १० । सिन्धुलीमा बिजुलीको पोलमा बाँधेर एक महिलालाई निर्घात कुटपिट गरिएको छ । कमलामाई नगरपालिका–४ की शारदा थापालाई पोलमा बाँधेर निर्घात कुटपिट भएको हो ।

थापामाथि अमानवीय व्यवहार भएको सूचना पाएपछि आइतबार प्रहरी प्रमुख एसपी राजकुमार सिलवाल नेतृत्वको टोली गाउँमा पुगेको थियो । थापालाई बाँधेर राखेकै अवस्थामा प्रहरीले उद्दार गरेको छ । प्रहरीले कुटपिटमा संलग्न उनका श्रीमानसहित ७ जनालाई पक्राउ गरेको छ । लेनदेनको विषयलाई लिएर श्रीमान् सहित गाउँका अन्य व्यक्तिहरुले उनलाई बाँधेर कुटपिट गरेको पाइएको प्रहरीको भनाई छ ।

केही दिनअघि पनि शारदाले आफूलाई श्रीमानले अपहरण गरेको भन्दै प्रहरी समक्ष पुगेकी थिइन् । आफूलाई सिस्नु पानीले हान्ने गरेको पिडित महिलाले बताएकी छन् । प्रहरीले पक्राउ गरेकाहरुको नाम सार्वजनिक गरेको छैन । उनीहरूलाई म्याद थप गरी विस्तृतमा अनुसन्धान गर्ने तयारी रहेको प्रहरीले जनाएको छ ।