काठमाडौं, पुस १५ । नेपाली भ्लगर उमा चाम्लिङ राइलाई सिक्किम प्रहरीले पक्राउ गरेको छ । राज्यमा साम्प्रदायिक द्वन्द्व भड्काउन खोजेको आरोपमा पूर्वी सिक्किमबाट शनिबार पक्राउ गरिएको हो ।
पक्राउ परेकी खोटाङकी युट्युबर उमा राई सिक्किमका विभिन्न जातजाति र सम्प्रदायबीच हिंसा भड्काउने खालका सामग्री युट्युबमा राख्दै आएको आरोप लगाइएको छ । उनले केही दिन अघि सामाजिक सञ्जालमा सिक्किमका राई समुदायका सदस्यहरूलाई आफ्नो अधिकारका लागि खडा हुन आग्रह गर्दै छोटो भिडियो अपलोड गरेकी थिइन् ।
सत्तारूढ सिक्किम क्रान्तिकारी मोर्चा पार्टीकी सदस्य शिला राईले भिडियो देखेर सदर पुलिस स्टेशनमा उजुरी दिएकी थिइन् । भारतको मुलुकी अपराध संहिता अनुसार उमा राईलाई सजायको माग गरिएको इन्डिया टूडेले उल्लेख गरेको छ । उनलाई अदालतमा हाजिर गर्दा पाँच दिनको म्याद थप गरिएको प्रहरीले जनाएको छ ।
