काठमाडौं, पुस २० । सशस्त्र प्रहरीले प्रहरी निरीक्षक, प्रहरी सहायक निरीक्षकदेखि विभिन्न पदहरूमा नयाँ भर्ना खुलाएको छ ।
शुक्रबार सूचना प्रकाशन गर्दै सशस्त्र प्रहरी बलले ९९ जना इन्स्पेक्टर, ९८ जना असई, ६५ जना भान्से, १० जना कूचीकार, ४ जना सूचिकार, ४ जना केशकर्तक, ५ जना चर्मकर्मी र ३ जना मालीका लागि दरखास्त आह्वान गरेको हो । सबै पदसहित गरेर सशस्त्रले २८८ जनाको नयाँ भर्ना खोलेको छ ।
प्रहरी निरीक्षकका लागि २१ वर्ष पुरा भई २५ वर्ष ननाघेको र सहायक निरीक्षकको लागि २१ वर्ष पुरा भई २३ वर्ष ननाघेको हुनुपर्ने सूचनामा उल्लेख गरिएको छ । योग्यता पुगेका तथा इच्छुक व्यक्तिहरूले माघ १० गतेसम्म आवेदन दिन सक्नेछन् । यस्तै, दोब्बर दस्तुर बुझाएर माघ २८ गतेसम्म पनि आवेदन दिन सकिनेछ । उम्मेदवारहरूले अनलाइनमार्फत पनि आवेदन दिन सक्नेछन् ।
प्रहरी निरीक्षक र सहायक निरीक्षक पदमा अनलाइन आवेदन दिएकाहरूमध्ये फागुन २ गतेभित्र र विभिन्न ट्रेड पदमा उम्मेदवारी दिएकाहरूले माघ २४ गतेभित्र दरखास्त दिँदा तोकिएको कार्यालयमा उपस्थित हुनुपर्नेछ ।
