काठमाडौं, फागुन २१ । वैभव गुप्ता ‘इन्डियन आइडल’ सिजन १४ को विजेता बनेका छन् । यूपीको कानपुर शहरका वैभव गुप्ताले २५ लाख रुपैयाँ पुरस्कारको साथमा मारुती सुजुकीको तर्फबाट नयाँ ब्रेजा कार पनि उपहार स्वरुप प्राप्त गरेका छन् ।
यस्तै, फस्ट रनरअप सुभदीप दास चौधरी र सेकेन्ड रनरअप पियुष पन्वारले ५/५ लाख रुपैयाँ प्राप्त गरेका छन् । थर्ड रनर अप अर्थात् अनन्या पालले तीन लाख रुपैयाँ पुरस्कार जितेकी छिन् ।
कार्यक्रममा श्रेया घोषाल, कुमार सानु र विशाल ददलानीले जज गरेका थिए भने कार्यक्रमको प्रस्तोता हुसेन कुवाजरवाला थिए । नेहा कक्कड र सोनु निगम शोको ग्रान्ड फिनाले एपिसोडमा विशेष अतिथिको रूपमा सहभागी भएका थिए ।
विजेता वैभव गुप्ताले आफूलाई बाल्यकालदेखि नै संगीतको शोक रहेको बताए । विद्यालयमा नै शास्त्रीय संगीतको तालिम लिएर ‘इन्डियन आइडल १४’ को लागि अडिसन दिएका थिए । सफ्ट र रोमान्टिक गीतहरू गाउनका लागि परिचित वैभवको हरेक सेलिब्रेटिहरुले तारिफ गरेका थिए । गायक सुखविन्द सिंहले पनि उनीसँग लाइभ प्रस्तुतिको लागि स्टेज सेयर गरेका थिए ।
हरेक पटक झै रियालिटी शोको यो सिजन पनि निकै रमाइलो रहेको थियो । स्मरण रहोस्, नेपालकी मेनुका पौडेलले पनि यस सिजनमा भाग लिएकी थिइन् । कार्यक्रमको सुरुवातीमै मेनुकाले ‘गोल्डेन माइक’ जितेकी थिइन् । हरेक प्रस्तुतिमा जजहरूको मन जितेकी उनी कम भोटका कारण टप १० बाट बाहिरिएकी हुन् ।
