काठमाडौं, चैत १९ । नेपाली कांग्रसकी सांसद प्रतिमा गौतमले सहकारीपीडितलाई न्याय दिनेगरी संसदीय छानबिन समिति गठन गर्नुपर्ने माग गर्नुभएको छ ।

सङ्घीय संसद्, प्रतिनिधिसभाको आजको बैठकको आकस्मिक समयमा बोल्दै सांसद गौतमले उप्रधानमन्त्री तथा गृहमन्त्री रवी छामिछानेमाथि सहकारीका रकम अनियमिततासम्बन्धी लागेको आरोपबारे संसदीय छानबिन समिति बनाएर निष्पक्ष छानबिन गर्नुपर्ने माग गर्नुभयो । सत्तापक्ष, प्रतिपक्षलगायत सबै दलको प्रतिनिधित्व हुनेगरी छानबिन समिति बनाउनुपर्ने उहाँको भनाइ थियो ।

“आजभोलि सहकारीपीडितहरु यत्रतत्र भेटिन थालेका छन् । आज विहान मात्रै गौशालाकी डङ्गोल थर भएकी महिला मेरो घरमा आएर आफू सहकारीबाट पीडित भएको बताउनुभयो । फुटपाथमा व्यवसाय गर्ने उहाँले सहकारीमा जम्मा गरेको रकम डुबेछ”, उहाँले भन्नुभयो, “ती दिदीले रुँदै सहकारीकै कारण बर्बाद भएको बताउनुभयो । उहाँ प्रतिनिधि पात्र मात्रै हुनुहुन्छ ।”

सांसद गौतमले सहकारीको समस्या एउटा व्यक्तिको मात्रै नभएर करिब ७४ लाख सदस्यको भएको बताउँदै उहाँले त्यसमध्ये करिब ६० प्रतिशत महिला र त्यसमा पनि मध्यम र निम्न मध्यमवर्गीय परिवार रहेको बताउनुभयो । उहाँले लाखौ व्यक्तिले दुःख गरेर सहकारीमा राखेको बचत जोखिममा परेको भन्दै सरकारको ध्यानाकर्षण गराउनुभयो ।

उहाँले सडकदेखि सदनसम्म, सामाजिक सञ्जालदेखि सार्वजनिक जीवनसम्म सहकारीको रकम ठगीका विषय चर्चामा रहे पनि सरकारले सहकारीपीडितको पीडा देख्न नसकेको उल्लेख गर्नुभयो । सरकारले सहकारी ठगीसम्बन्धी विषयलाई हल्कारुपमा  लिन नहुने भन्दै पीडितलाई न्याय दिनुपर्नेमा जोड दिनुभयो । उहाँले  सहकारीपीडितका विषयमा अनुसन्धान प्रक्रिया पूर्णरुपमा प्रभावित भएको र राजनीतिक नेतृत्वले गरेको प्रतिबद्धताप्रति विश्वासको सङ्कट सिर्जना भएको उहाँको भनाइ छ । उहाँले सहकारीपीडितको समस्या समाधान गर्न संसदीय छानबिन समिति बनाएर अगाडि बढ्न बारम्बार संसद्समक्ष राख्दै आए पनि प्रमाण छैन भन्दै टार्दै आएको बताउनुभयो । जनताको बचत फिर्ता हुने गरी छानबिन समिति बनाउनुपर्ने उहाँको माग छ ।
 

सुनारको परिवारलाई राहतको माग
नेपाल कम्युनिष्ट पार्टी (एमाले)का सांसद ठाकुरप्रसाद गैरेले पाल्पा रिब्दिकोट गाउँपालिकामा हत्या गरिएकी पद्मा सुनारको परिवारलाई राहतको व्यवस्था गर्नुपर्ने माग गर्नुभएको छ ।

प्रतिनिधिसभाको आजको बैठकको आकस्मिक समयमा सांसद गैरेले यही चैत १३ गते हत्या गरिएकी रिब्दिकोट गाउँपालिकास्थित खेया निवासी सुनारको परिवारको अवस्था अत्यन्त नाजुक रहेको भन्दै राहतको व्यवस्था गर्न माग गर्नुभएको हो ।

“पाल्पा जिल्लाको रिब्दिकोट गाउँपालिकास्थित खेया निवासी १२ कक्षामा पढ्दै गरेकी १९ वर्षीया सुनारको यही चैत १३ गते बिहान ९ बजेतिर पँधेरोमा नुहाउन जाँदा एक जना व्यक्तिले धारिलो हतियार प्रयोग गरेर उनको कायरतापूर्वक हत्या गरियो । हत्यामा संलग्नलाई अहिले प्रहरीले पक्राउ गरेको छ । हत्यारा पत्ता लागेको छ । तर पनि परिवारले राहत पाउन सकेको छैन”, उहाँले भन्नुभयो ।

सुनारमाथि भएका जस्ता घटनाले समाजलाई अत्यन्त उच्छृङ्खल र निराशा पैदा गरेको बताउँदै उहाँले गरी खाने सुनारको परिवार अत्यन्त पीडामा रहेको उल्लेख गर्नुभयो । “सरकारले पीडामा रहेको सुनारको परिवारलाई राहत हुने गरी केही व्यवस्थापन गरोस् भन्ने माग गर्न चाहन्छु, र यस्ता घटनालाई निरुत्साहित गर्नुपर्छ भन्नेतर्फ हामी सबैको ध्यान जानुपर्छ भन्नेतर्फ ध्यानाकर्षण गर्दछु”, उहाँले भन्नुभयो ।
    
सांसद गैरेले शनिबार आएको हावाहुरीका कारण तानसेन नगरपालिका कैलाशनगर निवासी २० वर्षीय भुवन सिङ्जालीको रुख ढलेर लाग्दा निधन भएकोप्रति दुःख व्यक्त गर्नुभयो । सो घटनामा एक जना घाइते हुनुभएको थियो । हावाहुरीकै कारण पाल्पाको रिब्दिकोट गाउँपालिकामा मात्रै रु आठ लाख बराबरको अकबरे खुर्सानीका विरुवा नष्ट भएको र त्यसबाट हुने आम्दानी करिब रु आठ करोड बारबरको क्षति भएको भन्दै सरकारको ध्यानाकर्षण गराउनुभयो ।

पाल्पाको रिब्दिकोटलगायतका गाउँपालिकामा सुन्तला खेतीयोग्य क्षेत्रमा हजारौँ सुन्तला र कागतीमा फूलमा क्षति हुँदा रु तीन करोड बराबरको आम्दानी गुमेको बताउनुभयो । उहाँले सोही क्षेत्रमा काक्रो, बोडी, गोलभेँडा फर्सीलगायतका विरुवामा पनि क्षति हुँदा रु चार करोड बराबरको क्षति भएको उल्लेख गर्नुभयो ।

त्यसैगरी पाल्पाको तिनाउ, तानसेन, रैनादेवी छहरा, बगनासकालीलगायतका नगरपालिका र गाउँपालिकामा हावाहुरीले दर्जनौँ घर र विद्यालयका छाना उठाएको भन्दै उहाँले सदनमार्फत सरकारको ध्यानाकर्षण गराउनुभयो । “विद्युत्का पोल ढलेका छन्, किसानले ठूलो मात्रामा क्षति बेहोर्नु परेको छ । पीडितहरुलाई सरकारले राहत र क्षतिपूर्तिको व्यवस्था गरोस”, उहाँले भन्नुभयो ।

एकातिर वन डढेलो तथा आगजनी र अर्कोतर्फ हावाहुरीसहितको वर्षाका कारण किसानले हरेक वर्ष समस्या भोग्नुपरेको उहाँको भनाइ छ । उहाँले सरकारले समयमै सम्भावित क्षतिको अनुमान गरी त्यसलाई न्यूनीकरण गर्ने, पीडितलाई तत्काल राहतको प्रबन्ध गर्न व्यवस्थित योजनाका साथ अगाडि बढ्नु अहिलेको आवश्यकता रहेको भन्दै सरकारको ध्यानाकर्षण गराउनुभयो । सांसद मनिष झाले मधेसमा एसइई परीक्षामा भएको खुल्लापनलाई गहिरो गरी अध्ययन गर्न माग गर्नुभयो ।