काठमाडौं, चैत २१ । गायक तुलसी सिवाकोटीको नयाँ गीत 'काठमाडौंमा' को विमोचन गरिएको छ । काठमाडौंमा आयोजित एक कार्यक्रम बीच राष्ट्रिय प्रजातन्त्र पार्टीका अध्यक्ष राजेन्द्र लिङ्देन, साहित्यकार रामबाबु सुवेदी, संगीतकार संघ नेपालका अध्यक्ष चेतन सापकोटाले सयुक्तरुपमा गीतको विमोचन गरेका हुन् ।
लामो समय देखि युरोपमा बस्दै आउनु भएका गायक सिवाकोटीको गीत 'काठमाडौंमा' शब्द, संगीत लोकप्रिय संगीतकार दीपक शर्माको रहेको छ भने नरेन्द्र वियोगले गीतलाई एरेन्ज गरेका हुन् ।
कार्यक्रममा गायक सिवाकोटीले सर्जकहरुलाई पनि सहयोग होस् भनेर आफूले हरेक पटक स्टेज सोहरुमा 'काठमाडौंमा' गीतलाई गाउदा यसका सर्जक दीपक शर्मालाई पनि केही प्रतिशत रकम छुट्याएर हस्तान्तरण गरिने घोषणा गर्नु भएको थियो सो कार्यको संगीतकार चेतन सापकोटा पनि प्रशंसा गरेका थिए । विशेषत सुदूरपश्चिम र कर्णालीबाट काठमाडौंको जीवन शैलीलाई नियाल्न खोजिएको गीतमा नेपाली ठेट शब्द र लयलाई प्रयोग गरिएको छ ।
गायक तुलसी सिवाकोटी र रोशनी कार्कीको अभिनय रहेको 'काठमाडौंमा' भिडियोलाई तुलसी सिवाकोटीको अफिसियल युट्युब च्यानल मार्फत सार्वजनिक गरिएको हो । उत्तम हुमागाईँको सिनेमाटोग्राफी, माधव बेल्बासेको सम्पादन रहेको भिडियोलाई प्रहिल कार्कीले निर्देशन गरेका हुन् ।
