काठमाडौं, चैत २६ । शनिबार काठमाडौंको भद्रकालीमा प्रदर्शनका क्रममा भिक्षुमाथि भएको दुर्व्यवहारको स्वीकार गर्दै नेपाल प्रहरी प्रधान कार्यालयले विज्ञप्ति जारी गरेको छ । घटनामा संलग्न प्रहरी कर्मचारीमाथि विभागीय कारबाही भइरहेको विज्ञप्तिमा उल्लेख छ ।
राजेन्द्र महतोको नेतृत्वमा विभिन्न जातजाति र धार्मिक समुदायका प्रदर्शनकारीले ‘बहुल राष्ट्र’ घोषणाको माग गर्दै गरेको प्रदर्शनका क्रममा उक्त घटना भएको हो ।
प्रहरीले भीडलाई तितरबितर पार्ने प्रयास गर्दा एक भिक्षुलाई प्रहरीहरूले दुर्व्यवहार गरेको देखाएको भिडियो सोसल मिडियामा देखिएको छ । जसको व्यापक आलोचना भइरहेको छ । त्यसको जवाफमा नेपाल प्रहरी प्रधान कार्यालयले विज्ञप्ति जारी गर्दै घटनाप्रति गम्भीर चासो व्यक्त गरेको हो ।
काठमाडौं प्रहरीका प्रवक्ता प्रहरी उपरीक्षक (एसपी) नवराज अधिकारीले प्रदर्शनकारीले आक्रोशित भएर प्रहरीमाथि आक्रमण गरेपछि बल प्रयोग गरिएको बताए । प्रहरी जवान रामसिंह बोहराको नाक भाँचिएको र अहिले आईसीयूमा उपचार भइरहेको एसपी अधिकारीले जानकारी दिए ।
