धरान, वैशाख १२ । पहिला घरदेश अनि परदेश भन्ने नाराका साथ सातैप्रदेशका मुख्य शहरहरुमा सांगीतिक कार्यक्रम गर्ने उद्देश्य अनुरुप पोखरापछि गत बैशाख ८ गते शनिबार धरानमा ‘रिभाइभ’ भएको सांगीतिक सदस्यहरु सहित लोकप्रिय पोखरेली ब्यान्ड ‘कन्दरा’ ले आफ्नो लोकप्रिय गीतहरु प्रस्तुत गरेका छन् ।

शनिबार राति धरान रंगशालामा सिल्भर इन्टरटेनमेन्टको आयोजनामा आयोजित “कन्दरा लाइभ इन धरान “ कार्यक्रममा धराने दर्शकमाझ  सेवारो धरान भन्दै अबेर गरी स्टेज चढेको कन्दराका ब्यान्डका मुख्य सदस्य तथा गायक विवेक श्रेष्ठले ‘तगारोमा रुमालराखी....’ बोलको लोकप्रिय गीतबाट कार्यक्रमको सुरुवात गरेका थिए ।

३२ वर्षअघि पोखरामा स्थापित भएको कन्दरा ब्यान्ड नेपाली दर्शक तथा स्रोतामाझ आफूलाई फरक पहिचान बनाउन सफल भएको छ र अहिले पनि कन्दरा ब्याण्डको लोकप्रियतामा कुनै कमी रहेको छैन भन्ने कुरा यस कार्यक्रमले पनि पुष्टि गर्दछ । ६ वर्ष अघि पनि पूर्वको धरान, दमक र बिर्तामोडमा आफ्नो सफल कन्सर्ट गरेको कन्दराले अहिले  पहिला घरदेश अनि परदेश भन्ने नाराका साथ आफ्नै देशमा घुम्नका लागि अर्थात् आन्तरिक पर्यटन प्रवर्द्धन गर्ने क्याम्पेन सहित कार्यक्रम गरिरहेको गायक विवेक श्रेष्ठले बताए ।

बीच–बीचमा पर्यटन प्रवर्द्धनको कुरा गर्दै उनले नयाँ पुरानासहित गीतहरु २ घण्टा सम्म लगातार गाइरहे । दर्शकहरु उनको गीतमा उनीसँगै गाउँदै, नाच्दै रमाइरहे । उनले रातै बिझायो – दिनै बिझायो, जिन्दगी यो उत्सव हो, विदेशिएर गईन् उनी, सुन्दर बिहानी, डांडापारी, भेडीगोठैमा, फुल्चोकीको डाँडैमा, चन्चले कान्छीको, तिमी पारी त्यो गाउँमा, लेककी हे माया, हङ्गकङ पोखरा  जस्ता आफ्ना अति नै लोकप्रिय गीतहरुसँगै भर्खरै रिलिज भएको गीत बिचरा म सँगै  जय जय नेपाल ,बोलको राष्ट्रिय गीत पनि प्रस्तुत गरेका थिए । उनले धरान तथा भेडेटार क्षेत्रमा पनि गज्जबको घुम्ने स्थानहरू रहेको बताए । ‘पोखरामात यति धेरै घुम्ने ठाउँ छ । धरानमा पनि घुम्ने ठाउँ रै’छ हो ।

धरानका मेयर हर्क साम्पाङ्गको कामको तारिफ गर्दै श्रमसंस्कृति पार्कको तारिफ गर्दै धरानको श्रम पर्यटनको प्रचार गर्ने समेत बताए । त्यस्तै  नमस्ते झरनाले मन लोभ्याएको पनि बताए।  मादलमा सुनिल थापा, पहिलो पटक जिप्सीज्याज म्युजिक भित्र्याएका  हरि महर्जन, पछिल्लो पुस्ताका चर्चित गिटारवादक देव लामा, बेस गितारमा पङ्कज झा, ड्रमसेटमा सुन्दर महर्जनलगायत ब्यान्ड सदस्यहरूको टिमअपमा कन्दरा लाई ‘रिभाइभ’ भएको हो । गत पुस २७ गते पोखरामा भव्य कन्सर्ट गर्दै कन्दरा फेरि श्रोता तथा दर्शकमाझ आएको हो ।

धरानको सुन्दर साउण्डको साउण्ड, लाइट, स्टेज व्यवस्थापन अहिले सम्मकै उच्च स्तरीय रहेको थियो । जसले गर्दा कार्यक्रम हेर्न आउने दर्शकहरुलाई कन्दराका लोकप्रिय गीतहरु सुन्नमा थप मज्जा आएको महसुस हुन्थ्यो । कन्दरा ब्याण्ड अब अन्य प्रदेशका मुख्य शहरहरुसँगै पूर्वका कुना– कन्दराहरुमा समेत आफ्नो प्रस्तुति लिएर आउने तयारी गरिरहेको गायक विवेक श्रेष्ठले बताए ।  इलाम खाँदबारी, धनकुटा, भोजपुर, खोटाङ, ताप्लेजुङ, पाँचथर, बिर्तामोड, विराटनगर, दमक, इटहरीसँगै बिभिन्न गाउँ–शहरहरुमा क्रमश आफ्नो सांगीतिक कार्यक्रमहरु गर्दै जाने उनले बताए ।