काठमाडौं, वैशाख ३० । नेपालमा अहिलेपनि कसैलाई क्यान्सर रोग लाग्यो भने उपचारको लागि ‘घरखेत नै बेच्नुपर्छ’ र त्यति गर्दा पनि क्यान्सरको बिरामीलाई बचाउन सकिँदैन भन्ने अन्धविश्वास विद्यमान छ ।

मुखले ठिक्क पार्ने आफन्त र छिमेकीहरू पनि यस्तो बेलामा काम लाग्दैनन् । उपचार खर्च दिनुपर्ला भनेर भाग्छन्  । त्यसैले भन्ने गरिन्छ—‘घरखेत पनि जाने र ज्यान पनि जाने’ यस्तो रोग शत्रुलाई पनि नलागोस् । तर क्यान्सरको उपचारको अहिलेको वास्तविकता भने यति भयानक छैन । समयमै क्यान्सर पत्ता लगाएर उपचार गर्न सकेमा विगतको तुलनामा नेपालमै सुलभ र गुणस्तरीय उपचार हुन्छ र बिरामीले पनि त्यति झन्झट व्यहोर्नुपर्दैन ।

यस्तै सन्देश दिनका लागि क्यान्सररोग लागेका एकजना बिरामीको घटनालाई समेटेर मह सञ्चारले ‘के डेरा के घर’ टेलि चलचित्र बनाएको छ । लामो समयदेखि चुरोटको लत लागेका हरिवंश (हरिशंकर) लाई फोक्सोको क्यान्सर लागेपछि मुखले ठिक्क पार्ने छिमेकी र आफन्तले उपचारको लागि बिरामीलाई विदेशमा लैजान गलत सल्लाह दिएपछि उपचार खर्च जुटाउनको लागि काठमाण्डौको आफ्नो महँगो घर आफ्नै घरमा भाडामा बस्ने मदनकृष्ण (मदन शंकर) लाई बेचेर हरिवंश सोही घरमा भाडामा बस्न वाध्य भएको कथावस्तुलाई आधार बनाई मह सञ्चारले ‘के डेरा के घर’ बनाएको हो ।

नेपालमै क्यान्सरको उपचार गर्ने अत्याधुनिक र सुविधासम्पन्न  अस्पताल तथा विशेषज्ञ चिकित्सकहरू हुँदाहुँदै पनि क्यान्सरका बिरामीलाई उपचारको लागि विदेशमा लैजाँदा धेरै खर्च लागेर आफूले दुःख गरि जोडेको एउटै मात्र घर पनि बेच्नु परेको तितो यथार्थ सो टेलि चलचित्रमा समावेश गरिएको छ ।

वरिष्ठ कलाकारद्वय मदनकृष्ण श्रेष्ठ र हरिवंश आचार्य, नरेन्द्र कंशाकार, नारायणदेवी श्रेष्ठ, सिरु बिष्ट, सावित्री शर्मा, राजु भुजूँ, शशिकुमार खड्का, पुजा लिम्बु, ओजश्वी बिष्ट, दीपक कोइराला, सहारा कोइराला लगायतको भूमिका रहेको सो टेलि चलचित्रलाई मह जोडीले निर्देशन गर्नुभएको हो ।

‘नेपालीको क्यान्सरको उपचार नेपालमै हुन्छ, विदेशमा जानु पर्दैन’ भन्ने सन्देश दिनको लागि सो टेलिचलचित्र बनाइएको उपचारको लागि सहयोगी हातहरु संस्थाकी अध्यक्ष एवम् नेपाल क्यान्सर हस्पिटलकी निर्देशक स्वरुपा श्रेष्ठले बताउनुभयो ।

राजधानीको सुन्धारास्थित सिटिसी मलमा शुक्रबार ‘के डेरा के घर’ को प्रिमियर शो देखाइयो । मह सञ्चारका संस्थापक एवम् निर्देशकद्वयको उपस्थितिमा देखाइएको सो प्रदर्शनीमा ललितपुर महानगर प्रमुख चिरीबाबु महर्जन, पहिलो महिला मोडेल एवम् क्यान्सर विजेता डली गुरुङ्ग याकथुम्बा, क्यान्सर विजेताहरु गायिका संगीता शाक्य थापा, ताराप्रसाद त्रिपाठीको साथै टेलिचलचित्रका निर्माण संयोजक किरण श्रेष्ठ, रोटरी क्लव यलका पदाधिकारी, नेपाल अर्बुद रोग निवारण संस्थाका पदाधिकारीहरू, क्यान्सर विजेताहरु एवम् नेपाल क्यान्सर हस्पिटल एण्ड रिसर्च सेन्टरका कार्यकारी अध्यक्ष डा.सुदिप श्रेष्ठ, मेडिकल निर्देशक डा. विजेशराज घिमिरे, विभिन्न विभागका प्रमुखहरु लगायत नर्सिङ्ग कर्मचारीहरुको उपस्थिति थियो ।  

कार्यक्रममा नेपाल क्यान्सर हस्पिटल एण्ड रिसर्च सेन्टरका कार्यकारी अध्यक्ष डा.सुदिप श्रेष्ठले नेपालमै क्यान्सरको उपचारको लागि अहिले विश्वस्तरीय अस्पतालहरु र विशेषज्ञ चिकित्सक हुँदाहुँदै पनि धेरै नेपाली बिरामीहरू आफन्त र छिमेकीको गलत सल्लाहमा उपचारको लागि विदेशिने गरेको र यसबाट लाखौं नेपाली रुपैयाँ विदेशिने गरेको र बिरामी र बिरामी कुरुवाले दुःख पाउने गरेको तथ्य औंल्याउनुभयो । त्यस अवसरमा  रोटरी क्लव यलका डा.रविन्द्र रायले पनि बोलेका थिए ।

मदन देवी फाउण्डेसन ललितपुर, नेपाल क्यान्सर हस्पिटल एण्ड रिसर्च सेन्टर हरिसिद्धि, आईजिआई प्रुडेन्शियल इन्सुरेन्स, नेपाल अर्बुदरोग निवारण संस्था ललितपुर शाखा, रोटरी क्लव अफ यल, उपचारको लागि सहयोगी हातहरु, ललितपुर महानगरपालिका वडा नं १६ र पूर्ण मंगल जोशीको आर्थिक सहयोगमा सो टेलिचलचित्र बनाएको हो । मह जोडीले उनीहरूलाई सम्मान पनि गर्नुभयो ।

मह सञ्चारले करिव ४० वर्षअघि ‘के घर के डेरा’ टेलि चलचित्र बनाएको थियो । शुक्रबार अपरान्ह ३ बजेदेखि युट्युबमा राखिएको सो टेलि चलचित्र शनिबार साँझ ७ बजेसम्म ३९ हजारजनाले हेरिसकेका छन् ।

- बलराम प्यासी