काठमाडौं, जेठ १५ । नागरिकता विवादमा पक्राउ परेका कान्तिपुर मिडिया ग्रुपका अध्यक्ष कैलाश सिरोहियालाई हेलिकोप्टरमार्फत काठमाडौं ल्याइएको छ । गत शुक्रबार स्वास्थ्य समस्या देखिएपछि उनलाई जनकपुरको काव्य अस्पतालमा भर्ना गरिएको थियो।

त्यहा उपचार सम्भव नभएपछि एयर लिफ्ट गरेर सिम्रिक एयरको हेलिकप्टरबाट काठमाडौं ल्याइएको हो । सिरोहियाको छाती अत्यधिक दुखाइपछि जनकपुरमा उपचार सम्भव नभएकोले काठमाडौं ल्याइएको कान्तिपुर मिडियाका कानुन विज्ञ किशोर पौडेलले बताए । उनलाई ललितपुरको मेडिसिटी अस्पताल लगिनेछ ।

सिरोहियालाई नागरिकता प्रकरणमा कान्तिपुर मिडियाको कार्यकक्षबाटै मंगलबार प्रहरीले नियन्त्रणमा लिएको थियो । उनलाई तेस्रो पटक धनुषा जिल्ला अदालतले थप ३ दिनको म्याद थपेर अनुसन्धान गर्न अनुमति दिएको छ ।