भक्तपुर, साउन ३१ । भक्तपुरको गठ्ठाघरमा मालबाहक ट्रकको ठक्करबाट स्कुटर चालकको मृत्यु भएपछि स्थिति तनावग्रस्त बनेको छ ।
बिहीबार दिउँसो सवा २ बजेतिर कोटेश्वरबाट भक्तपुरतर्फ गइरहेको ट्रकले स्कुटरलाई ठक्कर दिएपछि स्कुटर चालकको घट्नास्थलमै मृत्यु भएको थियो । ना ६ ख २१७३ नं.को ट्रकले बा ४९ प ८९४४ नम्बरको स्कुटरलाई ठक्कर दिएको हो । चालकको शरीर क्षतविक्षत भएको छ भने परिचय अझै नखुलेको प्रहरीले जनाएको छ । घटनास्थलमा झोला र किताब–कापी भेटिएका छन् ।
घटना ट्राफिक जाँचका लागि रोकिएको कारणले भएको भन्दै स्थानीय आक्रोशित भएका छन् । प्रहरी र प्रदर्शनकारीबीच ढुंगा हानाहान भएको छ । दुर्घटनास्थल अहिले तनावपूर्ण बनेको छ ।
प्रत्यक्षदर्शीका अनुसार गठ्ठाघर चोकमा ट्राफिक चेकजाँचको क्रममा ट्राफिकले रोकेको स्कुटरलाई पछाडिबाट तीव्र गतिमा आएको ट्रकले ठक्कर दिएर ५० मिटर अगाडिसम्म घिसारेको थियो । दुर्घटनापछि आक्रोशित भीडले ट्रकमा तोडफोड गरेका छन् । स्थानीय आन्दोलित भएपछि भक्तपुर–कोटेश्वर सडकखण्ड र सानोठिमी–जडीबुटी–पेप्सीकोला सडकमा यातायात ठप्प भएको प्रहरीले जनाएको छ ।
