काठमाडौं, भदौ १३ । अमेरिकामा हत्या भएकी नेपाली युवती मुना पाण्डेमाथि गोली चलाइ हत्या गर्ने अभियुक्तलाई ह्युस्टन प्रहरीले पक्राउ गरेको छ । उनको तस्बिर प्रहरीले सार्वजनिक गरेको छ ।
सर्वसाधारणको विभिन्न सुचनाका आधारमा बुधबार साँझ ट्राफिक जामको क्रममा उनलाई पक्राउ गरिएको हो । अमेरिकामा सञ्चालित नेप्योर्कका अनुसार अभियुक्तको तस्बिर सार्वजनिक भएपनि पहिचान भने खुल्न सकेको छैन् । सीसीटिभी फुटेजअनुसार मुना मृत भेटिएको स्थानमा अभियुक्त अगस्ट २४ को बेलुका ९ बजेर ४८ मिनेटमा देखिएको प्रहरीले जनाएको छ ।
अमेरिकाको टेक्सास राज्यको ह्युस्टनस्थित अपार्टमेण्टमा नेपाली विद्यार्थी मुना पाण्डेको गोली हानेर हत्या गरिएको थियो । नेपालमा भोजपुरकी पाण्डे सन् २०२१ मा अध्ययनका लागि अमेरिका पुगेकी थिइन् ।
मुना पाण्डेकी आमा अनिता पाण्डे अधिकारीले अमेरिकामा रहेका नेपाली समुदायसँग न्याय र सहयोगका लागि अपिल गरेकी छन् । श्रीमानसँग सम्बन्ध राम्रो नभएपछि मुनालाई आमाले एक्लै हुर्काएकी थिइन् । मुनाको हत्या किन भयो भन्ने बारे प्रहरी अहिले पनि अनुसन्धानमै रहेको छ ।
