नयाँ दिल्ली, मंसिर २६ । अल्लु अर्जुनको फिल्म ‘पुष्पा २: द रुल’ ले बक्स अफिसमा धमाका मच्चाएको छ । डिसेम्बर ५ मा रिलिज भएको यो फिल्मले पहिलो दिनबाट विश्वभर १७५.१ करोड कमाई गर्दै एस एस राजामौलीको आरआरआरको रेकर्ड तोडेको छ ।
सुकुमारद्वारा निर्देशित पुष्प २ मा अल्लु अर्जुनसँगै रश्मिका मन्डन्ना र फहद फासिल मुख्य भूमिकामा छन् । पुष्पा २ ले भारतमा मात्रै नभएर विश्वभर तरंग मच्चाइरहेको छ । सामाजिक सञ्जालमा रहेको पुष्पा २ को आधिकारिक पेजले आफ्नो १००० करोड रुपैयाँ संकलन भएको पोस्टलाई रिट्वीट गरेको छ ।
बाहुबलीले १० दिनमा १००० करोडको आँकडा पार गरेको थियो । अहिलेसम्म बाहुबली २ सबैभन्दा छिटो १००० करोड कमाउने फिल्म थियो तर अहिले यो रेकर्ड पुष्पा २ ले तोडेको छ । बाहुबली पछि एसएस राजामौलीको आरआरआर यो सूचीमा छ । जसले यो १६ दिनमा कमाएको थियो भने शाहरुख खानको जवानले १ हजार करोड कमाउन १८ दिन लगाएको थियो ।
पुष्पा २ को विश्वव्यापी कलेक्सनको कुरा गर्दा पहिलो दिन २९४ करोड, दोस्रो दिन ४४९ करोड, तेस्रो दिन ६२१ करोड, चौथो दिन ८२९ करोड, पाँचौं दिन ९२२ करोड कमाएको थियो र छैटौं दिन कलेक्सन १००० करोडभन्दा बढी पुगेको छ । सकनिल्कको रिपोर्ट अनुसार पुष्पा २ ले भारतमा हालसम्म ६४५.९५ करोड रुपैयाँ संकलन गरिसकेको छ ।
फिल्ममा फहद फासिलले प्रहरी अधिकृत भंवर सिंह शेखावतको भूमिका निर्वाह गरेका छन् । यो सँगै अल्लु अर्जुन फेरि एकपटक रातो चन्दन तस्कर पुष्पराजको भूमिकामा चर्चित भएका छन् । उनी र भंवरबीचको झगडा हेर्दा अचम्म लाग्छ ।
‘पुष्पा २: द रुल’ २०२१ मा रिलिज भएको ‘पुष्पाः द राइज’ को सिक्वेल हो । पहिलाे भाग ‘पुष्पाः द राइज’ ले पनि निकै सफलता पाएको थियाे । यस फिल्मबाट अभिनेता अल्लु अर्जुन र फिल्मका संगीतकार देवी श्री प्रसादले ‘नेशनल अवार्ड समेत पाएका थिए । यस फिल्मको तेस्रो भाग ‘पुष्पा ३’ पनि घोषणा गरिएको छ ।
