काठमाडौं, मंसिर २७ । चर्चित नेपाली ब्याण्ड अनुप्रस्थले यहि शनिबार मंसिर २९ गते च्यारिटी कन्सर्ट आयाेजना गर्दैछ । ‘म्युजिक टु हिल एन्ड हेल्प’ नामक च्यारिटी कन्सर्ट भृकुटीमण्डप काठमाडौंमा दिउँसो १२ बजेबाट सुरु हुने अनुप्रस्थ फाउन्डेसनले जानकारी दिएको छ ।

बज्र इभेन्ट्सको व्यवस्थापनमा हुन लागेको उक्त च्यारिटी कन्सर्टमा नेपालका चर्चित व्याण्ड तथा कलाकारहरुको उपस्थिति रहनेछ । कन्सर्टमा अनुप्रस्थ, मुक्ति एन्ड द रिभाइभल, कबवेब र सुबानी मोक्तानसहित अरु विभिन्न नेपाली कलाकारहरुको सहभागिता रहने जनाइएको छ ।

गरिब तथा विपन्न परिवारका क्यान्सर पिडीतहरुको उपचारमा सहयोग पुर्‍याउने लक्ष्यका साथ सो कन्सर्ट आयोजना गर्न लागिएको अनुप्रस्थका भोकलिस्ट निरन शाहीले जानकारी दिनुभयो । विगतका वर्षहरुमा पनि अनुप्रस्थ फाउन्डेसनले कन्सर्टको टिकटबाट आएको रकम गरिब क्यान्सर पिडीतहरुको उपचारको लागि सहयोग गरेको थियाे ।  टिकट दर रु ५०० रहेको छ ।

यस वर्ष पनि टिकटबाट आएको रकम ब्लड क्यान्सर पिडीत नवराज न्यौपाने, बोनम्यारो क्यान्सर पिडीत एक वर्षीया बालिका अदभिका र आन्द्राको क्यान्सरबाट पिडीत किर्ती दाहालको उपचारको लागि प्रयोग गरिने शाहीले जानकारी दिनुभयो  ।