काठमाडौं, मंसिर २८ । कीर्तिपुरस्थित त्रिभुवन विश्वविद्यालयको खेल मैदानमा जारी नेपाल प्रिमियर लिग (एनपिएल)मा आज दुई खेल हुँदैछन् ।
पहिलो खेल लुम्बिनी लायन्स र कर्णाली एक्स र दोस्रो प्रतिस्पर्धा विराटनगर किङ्स र चितवन राइनोजबीच हुनेछ । पहिलो खेल ९ः१५ र दोस्रो खेल १ः१५ बजे हुनेछ ।
कर्णालीले ५ खेलमा ६ अंक जोडेको छ । कर्णालीलाई लुम्बिनीविरुद्धको आजको खेल जित्नैपर्ने दबाब छ । लुम्बिनी प्रतियोगिताबाट बाहिरिइसकेकोले आजको नतिजाले प्लेअफमा प्रभाव पर्नेछैन ।
चितवन ५ खेलमा ३ जित र २ हारका साथ अंक तालिकाको तेस्रो स्थानमा छ । यो खेलमा पनि जित निकालेर प्लेअफ सम्भावना बलियो बनाउँने लक्ष्यमा चितवन रहेको छ ।
सन्दीप लामिछानेको कप्तानीमा रहेको विराटनगरको अंक दुई मात्र छ । ५ खेलमा ४ मा हार र १ मा जितका साथ विराटनगर तालिकाको पुछारमा छ । प्लेअफको सम्भावना कायमै राख्न विराटनगरलाई जित्नै पर्ने दबाब छ।
