हैदाराबाद, मंसिर २८ । दक्षिण भारतीय फिल्म अभिनेता अल्लु अर्जुनलाई प्रहरीले पक्राउ गरेको छ । गत ४ डिसेम्बरमा हैदरावादको सन्ध्या थिएटरमा भएको भागदौडमा एक महिलाको मृत्यु भएको आरोपमा हैदराबाद प्रहरीले अल्लु अर्जुनलाई पक्राउ गरेको हो ।

अल्लु अर्जुन ४ डिसेम्बर बुधबार राति हैदरावादको सन्ध्या थिएटरमा बिना जानकारी पुगेका थिए । उनी त्यहाँ आफ्नो फिल्म ‘पुष्पा २’ को स्क्रिनिङका लागि गएका थिए । अल्लु अर्जुनलाई देखेर आफ्नो मनपर्ने कलाकारलाई हेर्न थिएटरबाहिर उभिएका फ्यानहरू जम्मा भए र भागदौड मच्चियो । भिँडमा निसास्सिएर केही मानिस बेहोस समेत भए । तर यही भागदौडमा ३९ वर्षीया महिलाको मृत्यु भएको थियो भने छोरा गम्भीर घाइते भएका छन् । भीडलाई नियन्त्रणमा लिन प्रहरीले हल्का लाठीचार्ज गरेको थियो ।

प्रहरीले सन्ध्या थिएटर व्यवस्थापन, कलाकार र उनको सुरक्षा टोलीविरुद्ध मुद्दा दर्ता गरेको थियो । फिल्मको टोली प्रिमियरमा आउनेबारे प्रहरीलाई कुनै पूर्व सूचना नरहेको अधिकारीहरूले बताएका छन् ।

प्रहरीले अभिनेता अल्लु अर्जुन र थिएटर व्यवस्थापनविरुद्ध मुद्दा दर्ता गरेपछि थिएटर सञ्चालकसहित तीन जनालाई पक्राउ गरेको थियो । प्रहरीले अल्लु अर्जुनलाई शुक्रबार घरबाटै पक्राउ गरेको हो । अभिनेता र थिएटर व्यवस्थापन विरुद्ध लापरवाही र अपराधी हत्याको आरोप छ।