काठमाडौं, मंसिर ३० । यहाँ जारी नेपाल प्रिमियर लिग (एनपिएल) मा आज पनि दुई खेल हुँदैछन् ।
पहिलो खेल बिहान ९ः१५ बजे काठमाडौँ गुर्खाज र विराटनगर किङ्ग्सबीच हुने छ भने दिउँसो सवा एक बजे हुने दोस्रो खेलमा पोखरा एभेन्जर्स र सुदूरपश्चिम रोयल्स भिड्नेछन् । दुवै खेल त्रिभुवन विश्वविद्यालयको मैदान हुनेछन् ।
दुवै टोलीको यो समूह चरणको अन्तिम खेल हो । यसअघिका छ खेलमध्ये काठमाडौँ तीन खेलमा विजयी भएको छ । काठमाडौंलाई प्लेअफमा स्थान बनाउँन यो खेलमा जित आवश्यक छ ।
विराटनगर किङ्ग्सले छ मध्ये दुई खेलमात्र जितेको छ । पोखराको यो अन्तिम खेल हो । उसले पनि दुई खेलमात्र जितेको छ । सुदूरपश्चिमको भने यो छैटौँ खेल हो । यो टोली चार खेलमा विजयी भएको छ ।
लुम्बिनी यसअघि नै एनपिएलको दौडबाट बाहिरिसकेको छ भने जनकपुर चितवन राइनोजसँग पराजित भएपछि विराटनगर किंग्स र पोखरा एभेन्जर्स पनि प्लेअफ अभियानबाट अलग भएको छ ।
