काठमाडौं, माघ ४ । चर्चित गायन रियालिटी शो ‘द भ्वाइस अफ नेपाल’ छैठौं सिजन आज शुक्रबारदेखि प्रसारण हुँदैछ ।
हिमालय टिभीबाट प्रसारण हुने कार्यक्रम शुक्रबार र शनिबार राति ८ बजे प्रसारण हुनेछ भने भ्वाइस अफ नेपालको युट्युब च्यानलमा राती साढे ८ बजे सार्वजनिक हुनेछ । कार्यक्रमको प्रोमो यसअघि नै सार्वजनिक भैसकेको छ ।
यस सिजन ६ को कोचहरुमा गायक उदय सोताङ्गसँगै, राजु लामा, खेम सेन्चुरी र गायिका मेलिना राई रहेका छन् । कार्यक्रमको होस्टिङ सुशील नेपालले गर्नेछन् । यस सिजनमा गायक खेम सेञ्चुरी भने नयाँ कोचमा रुपमा आएका हुन् । गायक प्रमाेद खरेल भने यस सिजनमा देखिने छैनन् ।
कार्यक्रमको बिहीबार बानेश्वरस्थित आइएनआईको हल एनबी सेन्टरमा प्रिमियर गरिएको थियो । प्रिमियरमा हिमालय टिभी एचडीका अध्यक्ष धर्मराज भुसाल, निर्देशक श्याम कंडेल, कोचहरु राजु लामा र खेम सेन्चुरी, सुशिल नेपाल तथा निर्देशक लक्ष्मण पौडेलको उपस्थिति रहेको थियो ।
