काठमाडौं, फागुन २५ । पूर्वराजा ज्ञानेन्द्र शाह आज पोखराबाट काठमाडौं आउने अवसर पारेर राष्ट्रिय प्रजातन्त्र पार्टी लगायत राजावादीहरुले काठमाडौंमा शक्तिप्रदर्शनको तयारी गरेका छन् ।
राजतन्त्र समर्थकहरूले त्रिभुवन अन्तर्राष्ट्रिय विमानस्थलमा भव्य स्वागत कार्यक्रमको योजना बनाएका छन् । त्रिभुवन विमानस्थल गेटदेखि निर्मल निवाससम्म जुलुस निकाल्ने योजना रहेकाले सुरक्षा व्यवस्था कडा पारिएको छ ।
पोखराबाट आइपुगेपछि, पूर्वराजालाई रिङरोड हुँदै महाराजगञ्जस्थित निर्मल निवासमा रहेको उनको निवासमा जुलुसमा लगिनेछ। हालै गण्डकी प्रदेशका धेरै धार्मिक स्थलहरूको भ्रमण गरेका शाह आज दिउँसो काठमाडौं अवतरण गर्ने कार्यक्रम छ । काठमाडौं उपत्यकाका तीन वटै जिल्लामा सबै सुरक्षा निकायहरु परिचालन गरिएको छ । विमानस्थल प्रवेशमा कडाइ गरिएको छ । बिहानैदेखि सडकमा सुरक्षाकर्मीको उपस्थिति देखिन थालेको छ ।
राजधानीका प्रमुख चोकहरूमा सुरक्षाकर्मीहरू तैनाथ गरिएको छ, संवेदनशील क्षेत्रहरूमा पोशाकधारी र सादा पोशाकका दुवै अधिकारीहरू तैनाथ गरिएको छ । प्रहरीले उच्च सतर्कता अपनाउँदै हजारभन्दा बढी सुरक्षाकर्मी परिचालन गरेको छ। सरकारी पक्षको आजको प्रदर्शनमा करिब १० हजारको उपस्थिति हुनसक्ने आँकलन रहेको गृह स्रोतले जानकारी दिएको छ ।
नेपाल प्रहरी, अपराध अनुसन्धान कार्यालय, सशस्त्र प्रहरी बल र राष्ट्रिय अनुसन्धान विभागलाई परिचालन गर्दै एकीकृत सुरक्षा रणनीति लागू गरिएको छ।
