काठमाडौ, चैत १७ । सरकारले पूर्वराजा ज्ञानेन्द्र शाहको सुरक्षा टोलीमा हेरफेर गरेको छ । गृह मन्त्रालयले पूर्वराजा ज्ञानेन्द्रको निर्मल निवासमा सशस्त्र प्रहरी बलको कार्यदलबाट २५ जनाको टोली खटिँदै आएकोमा अब १६ जना मात्रै खटाएको छ । डीएसपी जगदीश हमालको नेतृत्वमा रहेको टोलीलाई फिर्ता बोलाएर प्रमोद प्रकाश पाठकको नेतृत्वमा १६ जनाको नयाँ टोली खटाएको हाे । 

यसअघि, शुक्रबार राति बसेको मन्त्रिपरिषद् बैठकमा, काठमाडौंको तीनकुनेमा हालै भएको हिंसात्मक घटना पूर्व राजा शाहसँग जोडिएको निष्कर्ष निकालिएको थियो । भिभिआइपी सुरक्षा नीति अनुसार १६ जना सुरक्षाकर्मी खटाउने प्रावधान छ, तर निर्मल निवासमा हालसम्म २५ जना खटिँदै आएका थिए।

यस्तै पूर्वप्रधानमन्त्रीहरु पुष्पकमल दाहाल र माधवकुमार नेपालका सुरक्षाकर्मीसमेत हेरफेर गरिएको छ । विशेष गरी भीभीआईपीको सुरक्षार्थ खटिएका सुरक्षाकर्मीले उनीहरूको निगरानीको सूचना संगठनलाई दिन छाडेपछि हेरफेर गर्नुपरेको उच्च सुरक्षा स्रोतले जनाएको छ ।