काठमाडौं, चैत १९ ।  भाटभटेनी सुपरमार्केटको कोटेश्वर शाखाले हालै भएको राजावादीको आन्दोलनको घटनामा वीरतापूर्ण कार्य गरेकोमा सुरक्षा गार्ड दुलप्रसाद पराजुलीलाई सम्मान गरेको छ।

आज एक विशेष समारोहमा भाटभटेनीका सञ्चालक मीनबहादुर गुरुङले पराजुलीलाई व्यक्तिगत रूपमा रु ५ लाख १ हजार १ सय ११ नगद रुपैयाँ पुरस्कार प्रदान गरेका हुन् । साथै पराजुलीलाई पाँच ग्रेड बढुवा गरिएको घोषणासमेत गरेका छन् ।

चैत १५ गते काठमाडौंको तीनकुनेमा भएको प्रदर्शनपछि भाटभटेनीकाे कोटेश्वर शाखा सुपरमार्केटमा लुटपाट गर्न आएकाहरूलाई साहसपूवर्क प्रतिकार गरेको भन्दै सुरक्षागार्डहरूलाई बुधबार भाटभटेनीले पुरस्कृत गरेको हो ।  उक्त दिन भाटभटेनीमा लुटपाट गर्नेहरू प्रहरीले ९ जनालाई पक्राउ गरेर प्रहरी ले अनुसन्धान गरिरहेको छ।

यस्तै, सञ्चालक मीनबहादुर गुरुङले उक्त घटनामा मृत्यु भएका पत्रकार सुरेश रजक र सवारी मजदुर सविन महर्जनको परिवारलाई क्रमशः ५ लाख र ३ लाख आर्थिक सहयोग गर्ने  घोषणा गरेका छन् ।