काठमाडौं, वैशाख १६ ।  लोपोन्मुख राउटे समुदायका प्रमुख सूर्य नारायण शाहीको निधन भएको छ । समुदायसँग नजिकका स्रोतहरूका अनुसार सोमबार राति करिब ९:३० बजे उनको निधन भएकाे हाे । उनको मृत्यु अत्यधिक मदिरा सेवनका कारण भएको बताइएको छ । 

शाही घुमन्ते वनवासीहरूमध्ये एक प्रमुख नेता थिए । उनले २०७२ जेठमा राउटे प्रमुखको भूमिका ग्रहण गरेका थिए  । राउटे समुदायका तीन मुखिया छन्, प्रत्येकले समुदायको तीन कुलमध्ये एकको प्रतिनिधित्व गर्दछ । सूर्य नारायण कल्याल कुलका थिए  । उनी समूहको नेतृत्व गर्दै बराहताल गाउँपालिका–८ सुर्खेतको सोतखोलामा बस्दै आएका थिए । 

राउटेहरूले प्रमुख शाहीको निधनमा शोक व्यक्त गरेका छन् ।  राउटे समुदायको कुल जनसंख्या अब १३५ पुगेको छ ।