काठमाडौं, भदौ २९। वैदेशिक रोजगार विभागले इजरायल जान इच्छुक युवाहरुको लागि लिइएको अंग्रेजी भाषा परीक्षाको परीक्षाफल प्रकाशन गरेको छ । विभागले लिएको अंग्रेजी भाषाको लिखित परिक्षामा २ हजार ३९ जनाले पास गरेका छन् । विभागले मंगलबार परिक्षाको नतिजा प्रकाशन गरेको हो ।
इजरायल जान ४ हजार २ सय महिला र ५ हजार ४ सय ९९ पुरुष गरी ९ हजार ६ सय ९९ नेपालीले आवेदन दिएका थिए । जस मध्ये ६ हजार ३९७ जना लिखित परीक्षामा सहभागी भएकोमा १ हजार ३९५ जना महिला र ६ सय ४४ पुरुष गरी कुल २ हजार ३९ जनाले अंग्रेजी भाषा पास गरेको विभागले जानकारी दिएको छ ।
असोज एक गतेबाट व्यावसायिक सिप विकास प्रतिष्ठान भैसेपाटी ललितपुरमा अंग्रेजी भाषा पास गर्नेहरुको उचाई र तौल परीक्षण तथा अन्तर्वार्ता हुने विभागले जनाएको छ। छनौट भएका उम्मेदवारहरुले उचाई र तौलको परीक्षण तथा अन्तर्वार्तामा सम्मिलित हुन आउँदा दरखास्त फाराम पेश गर्दा अनलाइन प्रणाली मार्फत बुझाएका सक्कल कागजात र प्रवेशपत्र लिई तोकिएको समय भन्दा १ (एक) घण्टा अगावै अनिवार्य उपस्थित हुनु पर्नेछ ।
तोकिएको उचाई र तौल सम्बन्धि मापदण्ड पुरा नहुने उम्मेदवारलाई अन्तर्वार्तामा सहभागी नगराइने बताइएको छ । तोकिएको शैक्षिक योग्यता, तालिमका प्रमाण पत्र एवं अनलाइन दरखास्तका साथ पेश गरिएका कागजातहरु प्रमाणित नभएमा जुनसुकै बखत दरखास्त रद्द हुनेछ ।
नेपाल सरकार र इजरायल सरकारबीच भएको श्रम सम्झौता अनुसार इजरायलका दीर्घकालीन स्याहार केन्द्रमा पठाइने सरकारले नेपाली सहायक कामदार पठाउन लागेको हो ।
