काठमाडौ, भदौ ३०। स्वास्थ्य तथा जनसंख्या मन्त्रालयका अनुसार पछिल्लो २४ घण्टामा नेपालमा थप एक हजार सात सय ६० जनामा कोरोना भाईरस (कोभिड १९) को संक्रमण पुष्टि भएको छ । देशभरका प्रयोगशालाहरुबाट कुल १६ हजार आठ सय ४४ जनाको नमुना परिक्षण गर्दा उक्त परिमाणमा संक्रमण पुष्टि भएको मन्त्रालयले जानकारी दिएको छ । पछिल्लो पटक थप भएका समेत गरी सक्रिय संक्रमितको कुल संख्या २६ हजार तीन सय तीन पुगेको छ ।

यसैगरी पछिल्लो २४ घण्टामा कोभिड १९ को संक्रमणबाट थप सात जनाको मृत्यु भएको छ । यो समेत गरी नेपालमा कोरोना संक्रमणबाट मृत्यु हुनेको संख्या १० हजार नौ सय ९१ पुगेको छ ।  मन्त्रालयका अनुसार यस अवधिमा कोभिड १९ को संक्रमणबाट मुक्त हुनेहरुको संख्या भने एक हजार दुई सय २० रहेको छ ।