लण्डन, असोज ४ । प्रिमियर लिगमा शनिवार चेल्सीले टोटनहम हट्सपरलाई ३–० ले पराजित गरेको छ । जितसँगै  चेल्सीले शीर्ष स्थानको लिभरपुलसँग अंक बराबरी गरेको छ ।

टोटनहमको घरेलु मैदानमा भएको खेलको पहिलो हाफ गोलरहित बराबरीमा सकिए पनि दोस्रो हाफमा चेल्सीले ३ गोल गरेको हो ।

खेलेको ४९औं मिनेटमा डिफेण्डर थियागो शिल्भाले मार्कोस अलोन्सोको पासमा गोल गर्दै चेल्सीलाई अग्रता दिलाउनु भयो  । खेलको ५७औं मिनेटमा एन गोलो मान्टेले माटेयो कोभासिससको पासमा गोल गर्दै चेल्सीको अग्रता दोब्बर पार्नु भयो । इन्जुरी टाइममा एन्जनियो रुडिगरले टिमो वेर्नरको पासमा चेल्सीका लागि तेस्रो गोल गर्नु भएको थियो।

यस सिजन चौथो जितपछि चेल्सीले पाँच खेलबाट १३ अंक जोडेको छ । लिभरपुल र म्यानचेष्टर युनाइटेडको पनि समान १३ अंक छ । तर गोल अन्तरमा लिभरपुल शीर्ष स्थानमै छ भने चेल्सी दोस्रो स्थानमा उक्लेको छ । युनाइटेड तेस्रो स्थानमा छ ।