काठमाडौँ , असोज १० । वैदेशिक रोजगार विभागले इजरायलमा केयर गिभरमा जान भाषा परीक्षा पास गरेकाहरु मध्येबाट एक हजार छ सय जना अर्को चरणको लागि छनौट गरेको छ। विभागले असोज ४ गतेदेखि ९ गतेसम्म लिएको अन्तर्वार्ताबाट एक हजार छ सय जना छनोट गरेको हो । सो सँगै विभागले नेपाल स्थित इजरायली दूतावासलाई छनौट नामावली समेत बुझाएको छ ।
इजरायल जान ४ हजार २ सय महिला र पाँच हजार चार सय सय ९९ पुरुष गरी नौ हजार छ सय ९९ नेपालीले आवेदन दिनु भएको थियो । जस मध्ये छ हजार तीनज सय ९७ जना लिखित परीक्षामा सहभागी भएकोमा एक हजार तीन सय ९५ जना महिला र छ सय ४४ पुरुष गरि कुल २ हजार ३९ जनाले अंग्रेजी भाषा परीक्षा पास गर्नु भएको थियो ।
तिनैमध्ये अन्तर्वार्ताको लागि १८ सय ३ जना सहभागी हुनु भएको थियो । अन्तर्वार्ताबाट ११ सय २० जना महिला र ४८० जना पुरुष गरि १६ सय जना सिफारिस हुनु भएको छ । अब सिफारिसमा परेका १६ सयलाई इजरायल सरकारले कम्प्युटर प्रणालीमार्फत ७० प्रतिशत महिला र ३० प्रतिशत पुरुष छनोट गर्नेछ ।
इजरायलमा आर्कषक कमाई हुने कारण नेपाली युवाहरु आर्कषित भएको पाईन्छ। इजरायल जानका लागि अनुमानित एक लाख ६५ हजार ७ सय लाग्ने अनुमान छ भने मासिक करिव एक लाख ९० हजार प्राप्त हुनेछ । इजरायल रोजगारमा जानेहरुले एक वर्षको करार अवधिको लागि जाने भएपनि ५ वर्षसम्म भिसा थप गरेर काम गर्न सक्छन् ।
नेपाल सरकार र इजरायल सरकारबीच २०७६ असोज १४ गते सम्पन्न श्रम सम्झौताअनुसार इजरायलका दीर्घकालीन केयरगिभरका लागि नेपाली सहायक कामदार पठाउन लागेको हो ।
