मिलान, असोज ११ । इटालियन सिरी ए फुटबल अन्तर्गत आइतबार राति भएको खेलमा युभेन्टस विजयी भएको छ।

घरेलु मैदानमा भएको खेलमा युभेन्टसले साम्पडोरियालाई ३–२ ले पराजित गरेको हो । खेलेको १० औँ मिनेटमा पउलो डिबाला, ४३ औँ मिनेटमा पाएको पेनाल्टीमा लियोनार्दो बानुकीले युभेन्टसको लागि गोल गर्नुभयो ।  ५७ औँ मिनेटमा मानुएल लोकातेलीले गोल  गर्दै युभेन्टसलाई जित दिलाउनु भयो  ।

साम्पडोरियका लागि योशिदाले ४४ औँ तथा कान्ड्रेभाले ८३ औँ मिनेटमा गोल गर्नु भयो । साम्पडोरिया खेलमा फर्किन कोशिस गरे पनि त्यो सम्भवन भएन र हार व्यहोर्न पुग्यो  । युभेन्टसले लिगमा यो सिजन लगातार दोस्रो जित दर्ता गरेको हो । जितसँगै ६ खेलबाट ८ अंकसहित युभेन्टस नवौँ स्थानमा रहेको छ ।

आइतबार राति भएका अरु खेलमा नापोलीले काग्लिएरीलाई २–०, लाजिओले रोमालाई ३–२, एम्पोलीले बोलोग्नालाई ४–२, फियोरेन्टिनाले युडिनेसलाई १–० तथा सासुओलोले सालेर्नितानालाई १–० ले पराजित गरेका छन् ।