काठमाडौ, असोज १३ ।चितवन–तराई र हिमाललाई जोड्ने उद्देश्यले चितवनको पदमपुरमा सञ्चालित ‘मुनाल एण्ड मयुर रिसोर्ट’ ले हेलिकप्टरमा उत्तरी गोरखाको मनास्लु हिमाल क्षेत्र घुमाउने प्याकेज ल्याएको छ ।

मनास्लु क्षेत्रको प्रवद्र्धनमा क्रियाशील पर्यटन अभियन्ता लाक्पाढुण्डुप लामाको समूहले पदमपुरमा सञ्चालन गर्दे आएको रिसोर्ट छोटो समयमा विशिष्ट स्वाद चाख्न चाहने आन्तरिक पर्यटकलाई लक्षित गरेर ४ रात ५ दिनको प्याकेज बनाएको हो। यसमा मुलुक भित्र जुनसुकै ठाउँका पर्यटक सहभागि हुन सक्नेछन् ।

दशैं अगाडि नै पर्यटकलाई मनास्लु घुमाउन सुरु गरिने पर्यटन अभियन्ता लाक्पा ढुण्डुप लामा बताउँछन्  प्याकेज मूल्य प्रति व्यक्ति एक लाख ३८ हजार रुपैयाँ राखिएको छ। यसमा दुईतर्फी हेलि टुर, गाइड सुविधा, ब्रेकफास्ट, लन्च, डिनर र बेड सुविधा हुनेछ । ‘हिमाली जनजीवन, भोटे संस्कृति र अर्गानिक वातावरणमा रमाउन चाहनेहरूका लागि हामीले यो प्याकेज बनाएका हौं’, पर्यटन अभियन्ता लामाले भने, ‘फेमिली, प्रेमिल जोडी र साथीसँगी मिलेर मनास्लु घुम्न सक्नेछन् । ’   

प्याकेजमा पर्यटकलाई चितवनको मुनाल एण्ड मयुर रिसोर्टबाट मनास्लु क्षेत्रको नामरुङसम्म हेलिकप्टरमा ओहोरदोहोर गराइनेछ। उनीहरूलाई पहिलो दिन नामरूङ गाउँ, नामरूङ झरना, गुम्बा, बुढीगण्डकी नदी र अर्गानिक स्याउ बगान घुमाइनेछ । दोस्रो दिन हिमालचुली बेस क्याम्पसम्म घुमाएर पुन नामरुङमै बास बसाइनेछ। बेस क्याम्प पदयात्रामा हिमालचुली, सृङ्गी र मनास्लु हिमालको दर्शनका साथै जंगली जनावर र चरा अवलोकन गराइनेछ ।  

तेस्रो दिनमा मनास्लु पदमार्गको ल्हो गाउँसम्म पदयात्रा गराइनेछ । ल्हो गाउँबाट मनास्लु हिमाल आँखै सामुन्ने देखिन्छ । त्यो रात ल्हो गाउँमै बसाएर चौंथो दिन नामरुङ फर्काइने छ ।  
यात्राको पाँचौ दिन नामरुङबाट उडाएर चितवन, पदमपुरस्थित रिसोर्टमा पर्यटकको विदाइ गरिने आयोजकले जनाएको छ । विदाई अगाडि हरेक यात्रुलाई मनास्लुको अर्गानिक उत्पादन उपहार दिइनेछ ।  

नामरुङमायही समूहले नमुना रिसोर्ट ‘नुब्री फोर सिजन रिसोर्ट’ सञ्चालन गर्दै आएको छ जुन मनास्लु पदमार्गकै सबैभन्दा महंगो र सुन्दर रिसोर्ट मानिन्छ । हेलि प्याकेजमा मनास्लु घुम्ने पर्यटकलाई तीन रात यही रिसोर्टमा राखिनेछ । पाँच सिट क्षमताका हेलिकप्टर प्रयोग गरिने भएकाले समूहमा बुकिङ गर्दा सजिलो हुनेछ । सबै पर्यटकको विमा गराएर यात्रामा लगिने रिसोर्टका सञ्चालक लामाले बताउनुभयो ।  

यस प्याकेजले हिमाल र तराईलाई जोड्नुका साथै सुस्ताएको पर्यटनलाई चलायमान बनाउन मद्दत गर्नेछ । पर्यटकको मागअनुसार तिहारसम्मै हेलि प्याकेज सञ्चालन गरिने रिसोर्टले जनाएको छ । प्याकेजका लागि लाक्पा ढुण्डुप लामा (९८५११५८०८८) र सृशिल चौधरी (९८६५३८१५१०) ले सहयोग गर्नु हुने बताइएको छ ।