काठमाडौं, असोज १४ । म्यानचेस्टर युनाइटेडले जित हात पारेको खेलमा क्रिष्टियानो रोनाल्डोले नयाँ कीर्तिमान बनाउन सफल हुनु् भएको छ । समूह एफ मा रहेको म्यानचेस्टर युनाइटेडले घरेलु मैदानमा भएको खेलमा स्पेनिस क्लब भिल्लारियललाई २–१ ले पराजित गरेको हो ।

बुधबार राति भएको खेलमा इन्जुरी समयमा रोनाल्डोले गोल गर्दै युनाइटेडलाई जित दिलाउनु भएको हो । उहाँले इन्जुरी समयको ५ मिनेटमा गोल गर्नु भएको थियो ।

भिल्लारियलसँगको खेल खेल्दै रोनाल्डोले च्याम्पियन्स लिगमा १७८औं खेल खेल्ने कीर्तिमान बनाउनु भएको हो । उहाँले १७७ खेल खेलेका स्पेनिस गोलकिपर इकर कसियासको कीर्तिमानलाई तोड्न सफल हुनु भएको हो ।

यस्तै खेलमा भने ५३ औँ मिनेटमा पाको अल्कासेरले गोल गरी भिल्लारियललाई सुरुवाति अग्रता दिलाउनु भयो । ६० औँ मिनेटमा ब्रुनो फेर्नान्डेसको सहयोगका एलेक्स टेल्सले युनाइटेडका लागि बराबरी गोल गर्नु भयो । त्यसपछि दोस्रो हाफको अन्तिम समय सम्म दुवै पक्षबाट कुनै गोल हुन सकेन ।

समूह चरणको पहिलो खेलमा पराजित भएको युनाइटेडले दोस्रो खेलमा जित निकाल्दै तीन अंक जोडेको हो । सोही समूहको अर्को खेलमा एट्लान्टाले योङ ब्वाइजलाई १–० ले पराजित गरेको छ ।