कतार, असोज २४ । क्रिष्टियानो रोनाल्डोले अन्तर्राष्ट्रिय फुटबलमा सर्वाधिक गोल गर्ने पुरुष खेलाडीको कीर्तिमान थप बिस्तार गर्नु भएको छ ।

शनिबार राति कतारसँग भएको मैत्रीपूर्ण खेलमा पोर्चुगलले ३–० ले हराउने क्रममा रोनाल्डोले आफनो कीर्तिमान थप बिस्तार गर्नु भएको हो ।

कतारसँग भएको मैत्रीपूर्ण खेलमा रोनाल्डोसहित जोसे फोन्ते र आन्द्रे सिल्भाले गोल गरेका हुन् ।

रोनाल्डोले ३७ औँ मिनेटमा गोल गरेर टिमलाई सुरुवाति अग्रता दिलाउनु भयो भने ४८ औँ मिनेटमा फोन्ते र ९० औँ मिनेटमा सिल्भाले गोल गर्नु भयो ।

रोनाल्डोले पोर्चुगलका लागि हालसम्म ११२ गोल गर्नु भएको छ ।  राष्ट्रिय टिमबाट सर्वाधिक गोल गर्ने पुरुष खेलाडी रहनु भएको रोनाल्डोले आफ्नो कीर्तिमान लगातार बढाउँदै लग्नु भएको छ ।

केही समय पहिले उनले १०९ गोल गरी इरानका अली दाईले बनाएको कीर्तिमान भंग गरेका हुन् । एजेन्सी