पेरिस, कार्तिक ४ । क्रिष्टियानो रोनाल्डोको गालेमार्फत् म्यानचेस्टर युनाइटेडले च्याम्पियन्स लिग फुटबलमा उत्कृष्ट पुनरागमन जित हात पारेको छ । रोनाल्डोले अन्तिम समयमा गोल गर्नु भएको थियो । समूह एफ अन्तर्गत बुधबार राति भएको खेलमा म्यानचेस्टर युनाइटेडले इटालियन क्लब एट्लान्टामाथि ३–२ को जित निकालेको हो ।

पहिलो हाफमा २–० ले पछि परेको घरेलु टोली म्यानचेस्टर युनाइटेडले दोस्रो हाफमा पुनरागमन गरेको हो । एट्लान्टाका लागि १५ औँ मिनेटमा मारिओ पासालिक र २८ औँ मिनेटमा मेरिह डेमिरालले गोल गरेर अग्रता दिलाउनु भएको थियो ।

दोस्रो हाफमा युनाइटेड खेलमा फर्कियो । ५३ औँ मिनेटमा मार्कस रासफोर्ड तथा ७५ औँ मिनेटमा ह्यारी मागुइरीले गोल गरेपछि युनाइटेडले बराबरी गर्न सफल हुनु भयो। रोनाल्डोले ८१ औँ मिनेटमा ल्यूक शको सहयोगमा हेड मार्फत गोल गरी युनाइटेडलाई जित दिलाउनु भयो।

जितपछि तीन खेलबाट ६ अंकसहित म्यानचेस्टर युनाइटेड समूहको शीर्ष स्थानमा पुगेको छ । चार अंकसहित एट्लान्टा दोस्रो स्थानमा झरेको छ ।

बुधबार राति नै भएको अर्को खेलमा योङ ब्वोइजलाई ४–१ ले पराजित गरेको भिल्लारियल चार अंकसहित तेस्रो स्थानमा छ । योङ ब्वाइजको तीन अंक छ ।