काठमाडौं, कार्तिक ११। काठमाडौं महानगरपालिका–३२ नरेफाँटस्थित सडकबाट २ किलो ५ सय ग्राम अवैध लागूऔषध चरेश र २ थान मोबाइल सहित २ जनालाई बुधबार साँझ प्रहरीले पक्राउ गरेको छ। पक्राउ पर्नेहरुमा काठमाडौं महानगरपालिका बालाजु बोहराटार बस्ने १९ वर्षीय युवराज स्याङ्बो र जुलाब सिं स्याङ्बो रहनुभएको छ । महानगरीय प्रभाग कोटेश्वारबाट खटिएको प्रहरीले उहाँहरुलाई जाँच गर्ने क्रममा उक्त चरेश सहित फेला पारी पक्राउ गरेको हो ।
यसैगरी काठमाडौं महानगरपालिका–३२ नरेफाँट फुटसलस्थित सडकबाट १ सय ५० ग्राम अवैध लागूऔषध गाँजा र ९ सय ग्राम अवैध लागूऔषध चरेस सहित २ जनालाई बुधबार दिउँसो प्रहरीले पक्राउ गरेको छ। पक्राउ पर्नेहरुमा ललितपुर महालक्ष्मी नगरपालिका बस्ने २८ वर्षीय विवेक रुम्बा र काठमाडौं महानगरपालिका–३२ जडिबुटी बस्ने ३४ वर्षीय अविनाश राज भण्डारी रहनुभएको छ । महानगरीय प्रहरी प्रभाग कोटेश्वरबाट खटिएको प्रहरीले जाँच गर्ने क्रममा रुम्बाको साथबाट ८ सय ५० ग्राम चरेस र भण्डारीको साथबाट १ सय ५० ग्राम गाँजा र ५० ग्राम चरेस सहित फेला पारी दुवै जनालाई पक्राउ गरेको हो । यस सम्बन्धमा प्रहरीले थप अनुसन्धान गरिरहेको जानकारी दिएको छ ।
