लन्डन, कार्तिक १५ । इङ्ग्लिस प्रिमियर लिग फुटबलमा वेस्ट ह्यामले एस्टन भिल्लालाई पराजित गरेको छ ।  गएराति भएको खेलमा वेस्ट ह्यामले १० खेलाडीमा सीमित एस्टन भिल्लालाई ४–१ गोल अन्तरले पराजित गरेको हो।

खेलको सातौँ मिनेटमा बेन जोनसनले गोल गर्दै वेस्ट ह्यामलाई अग्रता दिलाउनु भयो । ३४ औँ मिनेटमा ओली वाट्कीन्सले गोल गर्दै एस्टनलाई १–१ गोलको बराबरीमा ल्याउनु भयो । ३८ औँ मिनेटमा डिक्लन राइसले गोल गर्दै वेस्ट ह्यामलाई २–१ को अग्रता दिलाए । खेलको ५० मिनेटमा इज्री कोन्साले रातो कार्ड पाएपछि एस्टन १० खेलाडीमा समेटियो ।

८० औँ मिनेटमा पाब्लो फोर्नल्स र  ८४ औं मिनेटमा जारोड बोवेनले गोल गर्दै वेस्ट ह्यामलाई ४–१ को जित दिलाउनु भयो।

जितसँगै वेस्ट ह्याम लिगको चौथो स्थानमा उक्लिएको छ । वेस्ट ह्यामले १० खेलबाट २० अङ्क जोडेको छ ।

यस्तै, गएराति नै भएको  खेलमा  लिड्स युनाइटेड विजयी भएको छ । लिड्सले नर्विच सिटीलाई २–१ गोल अन्तरले  पराजित गरेको हो । एजेन्सी