काठमाडौं, कार्तिक १६ । सरकारले तिहारका लागि उपत्यका छाड्ने सर्वसाधारणका लागि कोरोना विरुद्धको खोपको व्यवस्था गरेको छ । स्वास्थ्य मन्त्रालयकाअनुसार अहिले बिहानदेखि नै काठमाडौं उपत्यकाबाट बाहिरिनेका लागि खोपको व्यवस्था गरिएको छ । त्यसका लागि काठमाडौंबाट बस छुट्ने मुख्य पाँच ठाउँमा खोप केन्द्र राखिएका छन् ।
कलङ्की, बल्खु, कोटेश्वर, नयाँ बसपार्क र सामाखुसीमा रहेका खोप केन्द्रमा गएर खोप लगाउन सकिने स्वास्थ्य मन्त्रालयका सहप्रवक्ता डाक्टर समिरकुमार अधिकारीले जानकारी दिनुभयो । केन्द्रमा पहिलो र दोस्रो दुवै मात्रा खोप दिइने छ । पहिलो मात्राको खोप लगाएकाले दोस्रो खोपका लागि खोप कार्ड अनिवार्य लैजानु पर्नेछ ।
यस्तै, अहिलेसम्म खोप नलगाएकाहरुलाई परिचय पत्रका आधारमा पहिलो डोज दिइनेछ । परिचयपत्र भएका १८ वर्ष भन्दा माथिका सबैले अस्ट्राजेनेकाको खोप दिने बताइएको छ । खोप आज र भोलि दिइनेछ ।
