म्याड्रिड, मंसिर ५ । प्रशिक्षकका रुपमा जाभीले बार्सिलोनामा विजयी सुरुवात गरेका छन् । स्पेनिस ला लिगा फुटबल अन्तर्गत शनिबार राति भएको खेलमा बार्सिलोनाले स्पानियोललाई १–० ले पराजित गरेको हो ।

बार्सिलोनाको प्रशिक्षकका रुपमा जाभीको पहिलो खेलमा जित दिलाउनका लागि ४८ औँ मिनेटमा पाएको पेनाल्टीमा मेम्फिस डिपेले गोल गरे ।

सोही गोल नै बार्सिलोनाको जितका लागि पर्याप्त बन्यो । जितपछि १३ खेलबाट २० अंकसहित बार्सिलोना छैटौँ स्थानमा पुगेको छ । १७ अंकसहित स्पानियोल ११ औँ स्थानमा छ ।

शनिबार राति नै भएको खेलमा एलाभेससँग २–२ को बराबरीमा रोकिएको सेभिल्ला १३ खेलबाट २८ अंकसहित पहिलो स्थानमा पुगेको छ । २८ अंक नै भएको रियल सोसिडाड दोस्रो स्थानमा झरेको छ ।

ओसासुनालाई १–० ले पराजित गरेको एथ्लेटिको मड्रिड १३ खेलबाट २६ अंकसहित चौथो स्थानमा छ भने १२ खेलबाट २७ अंकसहित रियल मड्रिड तेस्रो स्थानमा छ ।

शनिबार राति भएको अर्को खेलमा सेल्टा डी भिगो र भिल्लारियलले १–१ को बराबरी खेलेका छन्। एजेन्सी