काठमाडौं, मंसिर १४ । फ्रेन्च क्लब पेरिस सेन्ट जर्मेन पीएसजीका फरवार्ड लियोनल मेस्सीले बालोन ‘डी’ ओर अवार्ड जित्नु भएको छ । यो सँगै मेस्सीले कीर्तिमानी सातौँ पटक बालोन  ‘डी’  ओर अवार्ड प्राप्त गर्नु भएको छ ।

अर्जेन्टिनाका लियोनल मेस्सीले सन् २०२१ को उत्कृष्ट खेलाडी बन्दै बालोन  ‘डी’ ओर अवार्ड जित्नु भएको हो । फ्रेन्च फुटबलले गएराति विशेष समारोहकाबीच मेस्सीलाई बालोन  ‘डी’  ओर अवार्ड प्रदान गरेको छ । मेस्सीले रोबर्ट लेवान्डोस्की र जोर्गिन्होलाई पछि पार्दै अवार्ड हात पार्नु भएको हो ।
 
 मेस्सीले सन् २००९, २०१०, २०११, २०१२, २०१५ र २०१९ मा यो अवार्ड जितेका थिए। मेस्सी बालोन डी ओर जित्ने पीएसजीका पहिलो खेलाडी समेत बनेका छन् ।

म्यानचेस्टर युनाइटेडका फरवार्ड क्रिस्टियानो रोनाल्डो छैटौँ स्थानमा रहे ।

मेस्सीले आफ्नो कप्तानीमा अर्जेन्टिनालाई कोपा अमेरिकाको उपाधि दिलाएका थिए । फ्रेन्च फुटबलले खेल पत्रकार, राष्ट्रिय टिमका कप्तान र प्रशिक्षकहरुको भोटको आधारमा विजेता घोषणा गरेको हो ।

महिलातर्फको बालोन ‘डी’ ओर अवार्ड बार्सिलोनाकी एलेक्सिया पुटेलासले जित्नु भयो ।

यस्तै जर्मन क्लब बायर्न म्युनिखका पोलिस फरवार्ड रोबर्ट लेवान्डोस्कीले ‘स्ट्राइकर अफ दि इयर’ प्राप्त गरेका छन् । क्लब अफ दि इयरको अवार्ड चेल्सीले जितेको छ ।