पेरिस, मंसिर २३ । बार्सिलोना च्याम्पियन्स लिग फुटबलको समूह चरणबाटै बाहिरिएको छ । समूह ‘ई’ मा जित्नैपर्ने खेलमा बार्सिलोना बायर्नसँग ३–० ले पराजित भए सँगै समूह चरणबाट बाहिरिन पुगेको हो । बायर्नको घरेलु मैदान एलिउन्ज एरिनामा आज बिहान भएको खेलमा बार्सिलोना पराजित भएको हो ।

३४ औं मिनेटमा थोमस मुलर, ४३ औं मिनेटमा लिरोय साने र ६२ औं मिनेटमा जमलले बायर्नका लागि गोल गर्नु भयो । पहिलो हाफमा दुई गोलले पछाडि परेको बार्सिलोनाले दोस्रो हाफमा थप एक गोल खायो । यसअघि नै नकआउट चरणमा पुगेको बायर्नले समूह चरणमा शतप्रतिशत जित निकालेको छ । बार्सिलोना २१ वर्षपछि समूह चरणबाट बाहिरिएको हो ।

बायर्नले ६ खेलबाट १८ अङ्क जोडेको छ । पराजित बार्सिलोना ७ अङ्कका साथ तेस्रो स्थानमा छ । अर्को खेलमा बेन्फिकाले जित निकालेपछि बार्सिलोना समूह चरणबाटै बाहिरिएको हो । च्याम्पियन्स लिगको अर्को खेलमा बेन्फिकाले डाइनाभो किभलाई २–० ले हराएको छ । बेन्फिका समूह ‘ई’ को उपविजेताको रुपमा अन्तिम १६ मा पुग्न सफल भयो ।

बेन्फिकाको जितमा रोमन यारेमचुक र गिल्बर्टो जुनियरले गोल गरे । जितपछि बेन्फिकाले समूहमा ६ खेलबाट ८ अङ्क जोड्यो ।एजेन्सी