बेलायत, वैशाख २५ । इङलिस प्रिमियर लिगमा न्युक्यासलले , लेस्टर सिटी माथि चार दुइ गोलको जीत हात पारेको छ ।

अर्को सिजनको च्याम्पियनस लिगमा छनोट हुने दौडमा रहेको लेस्टर आफ्नै मैदानमा पराजित भएको हो । किङस पावर स्टेडियममा २२ औं मिनेटमा जो विललकको गोल मार्फत न्युक्यासलले अग्रता लिएको थियो । ३४ औं मिनेटमा पल डम्मेटले अग्रता दोब्बर पार्नुभयो  । ६४ औं मिनेटमा क्यालम विलसनले टिमका लागि तेस्रो गोल थप्नुभयो  । ७३ औं मिनेटमा उहाँले फेरी गोल गरेपछि  लेस्टर चार शुन्यले पछि परेको थियो । दश मिनेटको अन्तरमा लेस्टरले दुइ गोल फर्काएपनि हार टार्न सकेन । ८० औं मिनेटमा मार्क अलब्राइटन र ८७ औं मिनेटमा खेलेची इहिनाचोले गोल गर्नु भएको थियो  ।

जीतले रेलिगेसनमा पर्न सक्ने संभावित खतरा बाट न्युक्यासललाइ राहत मिलेको छ । न्युक्यासल ३५ खेलबाट ३९ अंक जोड्दै तालिकाको १३ औं स्थानमा छ । जुन १८ औं स्थानमा रहेको फुलह्याम भन्दा १२ अंकले माथि  हो । यसले न्युक्यासल प्रिमियर लिगमा सुरक्षित रहने लगभग निश्चित भएको छ । लेस्टर ६३ अंकका साथ तेस्रो स्थानमा यथावत छ । पांचौ स्थानमा रहेको वेस्टह्यामको ५८ अंक छ । तर उसले एक खेल कम खेलेको छ । लेस्टरले प्रिमियर लिगको बांकी खेलमा बलिया प्रतिद्धन्दीको सामना गर्दैछ । उसले अब आगामी मंलगबार दोस्रो स्थानको म्यानचेस्टर युनाइटेड संग खेल्नेछ भने १८ मे मा चेल्सिको सामना गर्नेछ । लिगको अन्तिम खेलमा टटेनहम संग २३ मे मा भिड्नेछ ।