काठमाडौं, पुस ४ । सिन्धुपाल्चोकमा जन्मिएर नेपाली लोक तथा दोहोरी गीत सङ्गीतको क्षेत्रमा क्रियाशील गायिका सुनिता दुलाल जिल्लाकै शान बन्नुभएको छ । उहाँ गीत संगीत कै माध्यमबाट विभिन्न मुलुकका सांगीतिक कार्यक्रमहरूमा सहभागिता जनाउने मध्य व्यस्तता भित्र पर्नुहुन्छ । गायिका सुनिताले व्यावसायिकता भन्दा पनि मौलिकतालाई प्राथमिकता राखेर कयौं गीतहरू बजारमा ल्याइसक्नुभएको छ । सोहिक्रम अन्तर्गत उहाँको पछिल्लो प्रस्तुति “मायाको डोरी” अहिले बजारमा लोकप्रिय बनिरहेको छ ।

लोक स्टार लगायतका विभिन्न सांस्कृतिक कार्यक्रममा निर्णायकको भूमिका समेत निर्वाह गरिसकेकी उहाँको पछिल्लो गीतमा प्रताप दासको पनि मिश्रण स्वर सुन्न सकिन्छ । लोक दोहोरीको स्वादमा सार्वजनिक भएको प्रस्तुत गीतलाई लय तथा शब्द सिर्जना बबिता बानियाँ जेरीले भर्नुभएको हो । सर्जक बबिता प्रत्यक्ष दोहोरीकी नामी कलाकार समेत हुनुहुन्छ ।

“मायाको डोरी” बोलको गीतको म्युजिक भिडियो पनि निकै तामझामका साथ तयार पारिएको छ । भिडियोमा पल शाह, केकी अधिकारी, अन्जना बराइली र भोजराज शर्माको आकर्षक अभिनय देख्न सकिन्छ । संख्यात्मक भन्दा गुणस्तरीयता लाई ध्यानमा राख्ने सुनिताको यस गीतलाई तयार पार्न अडियो तथा भिडियोमा कुनै कोणबाट कन्चुस्याइँ गरिएको छैन । काजिश श्रेष्ठद्वारा निर्देशित यस गीतको म्युजिक भिडियोलाई छायांकन उत्सव दाहालले गर्नुभएको हो भने सम्पादन प्रवीन श्रेष्ठले गर्नुभएको हो । गीतलाई सुनिता दुलाल युट्युब च्यानल मार्फत सार्वजनिक गरिएको छ ।

भिडियो लिंक
https://www.youtube.com/watch?v=SMJr9VWAUsM